Parlamento a haya un presentacion di gobierno riba e deal di Citgo. Ainda falta cierto detayenan, pero por lesa entre otro riba e modelo di negoshi su tras, e structura di e companianan envolvi, e palabracionnan riba cuanto impuesto Citgo mester paga, riba medio ambiente y tambe un lista di comparacion di e deal di Citgo cu esun gobierno di Corsou a negocia cu PDVSA.
Puntonan interesante:
1. Citgo lo paga 10% na impuesto di ganashi (normal 25%) y 6% ora e ganashi ta riba 100 miyon dollar. PDVSA na Corsou no ta paga nada (tax holiday).
2. Citgo ta haya e mesun preferencia fiscal cu Valero: entre otro no mester paga BBO/BAZV
3. PDV, e compania madre, ta para garantia pa un suma di 150 miyon dollar. Gobierno a firma solamente cu Citgo Aruba local pa cu e operacion di e refineria. Citgo Aruba si a firma cu Citgo Petroleum (Merca) pa cierto servicionan.
4. Citgo lo cubri 50% di e gastonan di dismantelacion den futuro. Refineria di Aruba lo cubri e otro mita. (PDVSA na Corsou no ta paga nada, solamente Refineria di Korsou di cual gobierno di Corsou ta e doño
5. Lo haci un estudio prome di e reapertura di e refineria y durante y na final di e lease cu Citgo riba e condicion di e suelo, awa subteraneo y marina.
