E chens cu nos isla lo wordo confronta cu un derame di azeta no ta algo di subestima; tur dia tankernan yena cu azeta ta pasa net pafo of den nos lama. Sinembargo e derame for di Trinidad ta mustra awor cu Aruba no ta suficiente prepara y ta falta di material pa proteha nos costanan (entre otro booms).
Esaki Bon Dia Aruba ta conclui a base di nos preguntanan na entre otro prome minister Mike Eman, como minister di Asuntonan General e ta presidente tambe di e team di prevencion di desaster. Ayera e ta admiti cu Aruba no tabata y no ta prepara riba e situacion, unda nan ta haya nan confronta cu azeta pisa (tarballs y patches). “It’s learning as we go. Como voorzitter di e rampenteam nos ta underprepared pa e situacion. Esey ta e les hopi importante di esaki.”
Segun e mandatario nan lo bay evalua y tambe wak por ehempel si ta necesario pa inverti den por ehempel den aparatonan cu ta midi coriente. “Nos mester wak unda nos lo inverti y cua caminda pa crece.”
Riba nos pregunta si Aruba tin un maneho di prevencion ora di wordo confronta cu contaminacion di azeta pisa, Rino Hermans di Oficina di Prevencion di Desaster ta bisa no. Pero cu en general e ta algo dificil pa preveni, e ta bisa, pa e tarballs etc. lo yega nos costanan. Esey segun e, no ta algo cu ta dificil pa Aruba so, pero tur caminda nan ta lucha e forma di derame aki. Si e tabata un mancha, e ora nan por uza booms como prevencion.
Falta di material
Sinembargo sr Hermans ta admiti cu Aruba ta falta material pa proteha nos costanan y beachnan. Esey a resulta awor cu nan a bay inventari pa motibo di e derame for di Trinidad. No tin suficiente material di prevencion, asina e conclusion ta. Sr. Hermans ta bisa finalmente cu tin manera ‘ocean booms’ cu toch por yuda preveni azeta pisa lo susha nos costanan. Pero nan ta hopi caro, segun e: Mas cu 100.000 dollar pa cada un.
