‘Les pa tur otro isla: mester sistema di candela’

Den un entrevista di Bon Dia Aruba cu Roy Tromp di Brandweer, e ta spera cu e candela na Renaissance Island ta un les pa tur otro isla, pa tin un sistema di candela. E feezer den e cushina di Renaissance Island a pega candela pero pa motibo di falta di un sistema pa paga, e candela por a sigui cana, destrui full e restaurant.

Lesa aki bou e articulo completo cu a sali den corant Bon Dia Aruba di awe:

Candela a cuminsa bou di freezer y a sigui cana

 Ayera mainta den oranan trempan por a mira candela grandi pazuid di Aruba. Trahadonan cu tabata riba e isla di Renaissance a bati alarma pa motibo di candela. E cushina riba e isla a pega na candela y no por a haci hopi pa salba esaki.

E trahadonan a subi isla di Renaissance pa 7.15 di mainta y asina cu nan a yega banda di e bar, nan ta mira huma ta sali. Nan ta bay controla y ta nota cu e freezer, unda cu nan ta warda juice y otro articulonan di bebe, tabata tin candela bou di dje. Nan a purba di paga e candela, pero e candela a cana y subi e palonan den cushina bay halto. E candela a yega na e di dos piso unda cu tin pakinan cera di serbete y papel. Asina aki e candela a para bira mas grandi te pega e cushina completo. “E trahadonan no tabata tin nada pa paga e candela. Nan no tabata sa kico pa haci. Nunca nan a haya un training pa combati un candela di biaha,” el a bisa.

Sistema di paga candela
Segun Sr. Roy Tromp, di Brandweer na Bon Dia Aruba, riba e isla no tin un sistema di paga candela. Loke cu nan tabata tin riba e isla, tabata un aparato chikito di puiro. Na momento cu mester a basha awa, no tabata tin slang. “Brandweer no por a haci mucho,” Sr. Tromp a indica. Pa Brandweer por a yega riba e isla, nan mester a haci uzo di e boto di Renaissance mes. Tabata tin 1 capitan e mainta aki cu tabata core cu e boto entre e isla di Renaissance y tera, pa asina e bomberonan por a subi e isla cu tur nan materialnan.

Proceso largo
E proceso a bira uno largo pasobra, na prome instante no por a laga aeropuerto sin bombero, di cual mester a warda riba algun pa yega na e post di Brandweer. Despues e bomberonan a yega banda di Nikki Beach cu truck pero ta bay bek mirando cu mester a mira con por subi e isla y transporta tur cos. Pa por haya un boto pa hiba e bomberonan riba e isla di Renaissance, Brandweer lo mester a check cu Departamento di Servicio di Puerto pa un boto hiba nan, pero Renaissance tin su propio boto y esaki a haci cu por a haya boto lihe. Durante e proceso aki bomberonan a bay cu pomp. Na nan yegada a pone e pompnan traha y a cuminsa domina e candela haciendo uzo di e unico recurso na e momento ey cu tabata awa di lama.

Boto di polis
Boto di polis no a presenta pa duna bomberonan asistencia. Pero Warda Nos Costa si a sali y tabata dispuesto pa yuda unda nan tabata por. Cu e tiki material cu bomberonan tabata tin no tabata suficiente, Warda Nos Costa a laga bomberonan haci uzo di e pomp cu nan tabata tin. “Si e candela tabata riba tera, por a paga esaki. Pero como cu el a gara e palonan, no por a haci hopi,” Sr. Tromp a indica.

Peliger mas grandi
E peliger mas grandi cu tabata tin ta e boter grandi di gas yen cu tabata den e cushina. No tabata tin un sistema di fria e boter di gas, y mester a percura pa esaki no pega candela. E unico opcion cu tabata tin na e momento ey, e bomberonan a dicidi di haci uzo di un draga. Cu e draga aki tabata saca awa di lama y basha riba e boter di gas. Segun Sr. Tromp, si e boter di gas lo a explota, esaki lo tabata un desaster mas grandi.

Kico falta?
Riba e isla sikiera mester tin un slang di awa cu presion halto, asina señor Tromp a indica. Spera cu esaki ta un les pa tur otro islanan, segun Sr. Tromp. Ta bon pa tin un sistema di paga candela pa ora di emergencia, cual por yuda paga candela. E personal di e compania cu ta traha riba e isla mester sa kico pa haci den caso di un candela of cualkier tipo di situacion.

Sr. Tromp ta sigui bisa Bon Dia Aruba, cu ta bon pa e compania drecha e luga pasobra esaki ta trece entrada pa e compania. Pero cu Brandweer ta encarga pa controla e cushina pa nan tin un sistema pa paga candela.