Un di e casonan extraordinario cu a tuma luga den 2017 tabata esun di Leoni ‘Noni’ Brokke. Manera conoci, Noni tabata envolvi den un accidente pisa unda cu mediconan na Aruba a hasta yega na e conclusion cu e hoben lo nunca drecha mas di dje. Sinembargo famia di Noni despues di a mir’e envolvi den un accident cu brommer, a keda cu speransa cu e hoben lo por recupera y biba un bida normal. E hoben ta den proceso pa lanta un fundacion cu lo por sirbi como inspiracion ‘pa e ta un ehempel na hende pa no give up ora tin dificultad’.

Nos a sinta hunto cu famia di Noni y e hoben mes, kende a bin pasa aña nobo na Aruba. Noni lo sigui su tratamento na Colombia despues di subi avion awe, unda apart di haya tratamento e ta sigui terapia di tur tipo, entre otro: hidroterapia, psicopedagogia, fonoaudiologia, gimnasia, electroterapia, mecanoterapia, terapia ocupacional y asina tin mas.

Noni lentamente ta mehorando

E meta actualmente cu e hoben hunto cu su famia kier yega na dje ta pa e por cuminsa cana bek. Amber Brokke, ruman di Noni ta conta Bon Dia cu cada luna tin algun reto nobo pa deal cu ne. Sea si ta reto financiero of un reto cu Noni mester enfrenta den tratamento of terapia pa asina poco poco yega na su meta di ta 100% bek, e peso riba ful e famia ta pisa. “No ta cu un hende tey vast cerca dje. Cada un di nos mester keda cambia turno pa ta cu Noni. Biaha pasa tabata su pareha pues asina nos ta keda bay beurt pa beurt.” Pero pa e famia e reto mas grandi ta keda uno financiero, mirando cu manera nos a bin ta reporta, AZV no ta cubri gastonan relaciona cu e caso aki.

Pues pa algun tempo e famia ta organisando varios recaudacion di fondo cu ta e manera principal con nan por sigui paga e gastonan medico cu Noni ta haya pa por mehora. Den pasado nos a yega di trece dilanti cu AZV a exigi cu seguro di e persona particular cu a causa e accidente, cual segun sra. Brokke ta un pensionado, lo mester paga pa e gastonan medico. Sinembargo segun sra. Brokke, pasobra e persona ta pensionado ‘nos no por bay su tras’.

Cana caminda pa haya derecho na corte

Den cierto caso extraordinario cu nos a mira den 2017, manera esun di baby Lunah, ciudadanonan ta opta pa bringa casonan contra e institucion cu ta nenga di brinda compensacion pa gastonan relaciona cu proceduranan medico. Den baby Lunah su caso e mayornan a te hasta gana nan caso contra e organo ehecutivo di AZV. Pues si famia di Noni lo sigui e mesun caminda di cruz, sra. Brokke a splica cu nan ta enfocando riba mehora situacion di Noni prome cu bay bringa algun caso. Specialmente pasobra e parti financiero ta preta y apart di e placa envolvi pa paga abogado, e proceso lo tuma basta tempo.

Sinembargo, sra. Brokke a splica cu despues cu Noni mehora substancialmente, e famia lo sa di persigui tanto e persona particular cu tabata envolvi den e accidente como e organo responsabel pa seguro medico na Aruba. Nan lo busca pa haya nan derecho den corte contra AZV pasobra segun sra. Brokke, Noni tin derecho pa haya 150 mil florin pasobra e accident no tabata su fout. “AZV a blokia un parti di e placa pa cover e gastonan di 6 siman di hospital kinan na Aruba. Pero ora nos a pidi pa nan kita e limitacion aki, nan a nenga esaki bisando cu un hende tin cu cover e gastonan di hospital.”

Pa sra. Amber e ta increibel cu kier bay cobra 110 mil florin pa un trabou cu practicamente no a wordo haci. Esaki debido na e manera con ora Noni a yega Colombia, e dokternan eynan a bisa e famia cu si Noni lo tarda 2 dia mas, e por a fayece. “Nos no ta compronde con nan kier a cobra asina hopi placa sabiendo cu Leoni tin AZV.”

Diferencia entre cuido na Colombia y Aruba
Nos a puntra sra. Brokke si e por nota algun diferencia den e cuido of calidad di servicio cu ta wordo duna na Aruba versus e cuido cu Colombia ta brinda. Riba esaki e hoben a comenta cu e conoce di 2 caso similar na esun di Noni. Den un di e casonan aki cu a dicidi di keda Aruba al contrario na Noni, e persona a drenta coma y ya caba ta wardando un aña pa ricibi tratamento, segun sra. Brokke. Ademas di esaki e hoben ta haya cu na Colombia nan ta dispuesto pa yuda semper, sin importa si bo ta stranhero of no, ‘hera nan ta duna extra ayudo’. Esaki compara na Aruba unda cu hopi biaha ta nenga ayudo na propio yiu di tera. “Kinan al contrario Noni cu ta Rubiano y ta biba kinan nan kier neng’e.”

Te hasta si e trato medico no ta adecua na Aruba, sra. Brokke a expresa cu aunke sea lo mester percura pa e pashent haya cuido medico adecua den exterior. “Manera cu e situacion actual ta, nos sa cu Noni por bira bon bek. Un organo manera AZV tambe tin cu wak e banda humano. Pero e manera con cos ta actualmente ta mustra cu nan ta poniendo bida di no solamente Noni, pero di hopi mas persona ‘on hold’. Durante nos entrevista, Noni mes a expresa su descontento cu AZV, den poco palabra laga nos bisa den un forma “poetico”.

Ademas di cuido medico, e acceso na terapia na Aruba cu ta wordo cubri pa AZV ta limita na un ora pa siman, segun sra. Brokke. Esaki compara cu e 8 pa 9 ora di terapia diario den siman cu Noni ta hayando na Colombia. “Pero tur esaki ta cay riba mi mama directamente”, e hoben a splica.

Kier cuminsa un fundacion

Famia di Noni y e hoben mes a expresa di kier cuminsa cu un fundacion. Esaki nan ta den proceso pa lanta, segun sra. Brokke. “Leoni mes kier lant’e pa e ta un ehempel na hende pa no give up ora tin dificultad.”