Caso Avestruz ta e caso mas grandi di corupcion di tereno na Aruba. Un total di 11 sospechoso ta wordo acusa den e caso caminda e sospechoso principal ta ex-minister y actual parlamentario Sr. Oslin “Benny” Sevinger.
Durante e proximo dianan Bon Dia Aruba lo detaya un biografia chikito di cada di e sospechoso pa asina pueblo di Aruba por conoce e sospechosonan aki un poco mas y kico ta e acusionnan contra e sospechosonan aki.
Maria Leoncita Arends
Sra. Arends no ta un persona desconoci den comunidad. Arends ta conoci pa tin diferente negoshinan rond di Aruba y tambe eherce diferente funcionnan. Entre otro, managing director di stacion di radio Canal 90.
Caso Avestruz
Arends como un di e 11 sospechosonan den e caso grandi aki ta wordo acusa di falsificacion, estafa y soborno di ambtenaar. Arends ta wordo sospecha di a haci esaki entre Januari 2013 te December 2017.
Arends a wordo deteni dia 13 di april 2021 despues cu Landrecherche a haci entrada hudicial na su cas y a permanece cera pa mas di 40 dia. Mester menciona cu yiu muhe di Sra. Arends, R. Richardson tambe a keda deteni como parti di investigacion di e caso.
Curt Harms
Sr. Harms ta un comerciante conoci na Aruba. E ta doño di Summit Partners for di 2006, e ta co-fundador di Cable Television of Aruba NV y a fungi como miembro di directiva for di 1992 te cu 2004.
Caso Avestruz
Manera varios di otro sospechosonan den caso Avestruz, unda e sospechoso principal ta Sr. Benny Sevinger, Harms ta wordo acusa di soborno di un ambtenaar y labamento di placa di Januari 2014 te December 2017.
