Ayera mainta, lider di Partido Direccion Politiea (PDP), Leonardo Figaroa a tene un conferencia di prensa unda el a cuestiona algun punto y tambe a informa cu el a entrega diferente carta pa haya documento y por informa pueblo miho tocante varios topico.

Figaroa a señala cu e tin un preocupacion pa loke ta trata e maneho di DIP, caminda el a manda na parlamentarionan un carta relaciona cu DIP tin un rol importante riba economia. Ademas el a solicita na minister presidente, Evelyn Wever-Croes, cierto documentonan riba e investigacion cu a ser haci y tambe e “depolitisacion” di departamentonan manera a sigura. “Pasobra e no a bin parlamento y splica precies con el a haci uso di e ley cu DIP ta traha cune. Ademas con bo por garantisa cu ora bo ta duna e departamento di DIP un mandato cu bo no ta bay hinca man politicamente, nos ta spera cu parlamento por haci algo. P’esey nos a entrega par di carta na parlamento dialuna ultimo regardando e preocupacionnan cu nos tin, pasobra sea e minister no ta haciendo su trabao, e ta desvia di locual ta su autoridad of e ta gañando pueblo atrobe cu implicacionnan grandi pa locual ta impacto socio economico.”

Figaroa ta afirma cu e ta sinti su mes hopi preocupa pa expresionnan haci pa minister di Energia, Glenbert Croes riba e tema exploracion di gas y tambe cifranan di desempleo bao di hobennan, y pa e motibo a entrega un LOB Verzoek riba esey.

Figaroa ta sigura cu e ta para contra tur exploracion di gas y/of petroleo. “Como hoben politico, mi no ta kere cu e hecho cu cada biaha prome cu eleccion ta bin cu expresionnan populista pa purba gana voto y ta gaña full un districto di San Nicolas cu e ta bay habri e refineria,” el a bisa.

Tocante cifranan di desempleo cu a baha cu 9%, Figaroa entrega un LOB Verzoek pa puntra e minister encarga ki estudio Departamento di Labor ta haci pa yega na e porcentahe ey.

Tambe, Figaroa a sigura cu el a solicita na minister di Husticia y Asuntonan Social, Rocco Tjon, algun documento cu ta relaciona cu derecho di mucha y ta enfoca riba abuso sexual. For di 21 dia pasa Figaroa a solicita rapport of conseho cu Tjon a laga traha, debi cu segun Figaroa ta señala, e minister a informa prensa cu el a institui un comision cu lo keda encarga cu e tareanan di derecho di mucha, pero e dianan ta pasa y Figaroa a señala cu e no a haya un contesta. “Esaki ta un tiki desapunto mirando cu esaki ta un gobierno cu tabata priminti bon gobernacion y transparencia.”

Segun articulo 4 inciso 4, e minister por informa despues di 3 siman na en persona cu a haci e peticion cu kisas ta bay tin mester di 21 dia mas. Esey tampoco no a sucede y e ora ey pa Figaroa, esey kiermen cu nan no a haya un contesta. Sinembargo, ayera a entrega un bezwaarschrift.

“E meta cu mi tin cu esaki no ta solamente pa informa pueblo cu nos ta biba riba un pais cu tin derecho, mi ta comprende cu tin hende cu ta bisa cu mi ta haci esaki como stand politico, pero como un organisacion politico nos no ta sinta den parlamento ainda y esey ta pone e ora ey cu a mi no ta bay ataca un politico pa pret, pero mi kier tin e documentacion corecto pa ora mi bay eleccion otro aña nos por bin cu proposicionnan tambe cu ta real. P’esey nos a pidi e documento di e minister concerni,” el a sigura.

Di mesun manera, un otro carta a bay na presidente di parlamento, Edgard Vrolijk, pa motibo cu na 2020 Aruba a tene un manifestacion masha grandi mes pa expresa e rechaso contra abuso sexual di mucha. Di esaki, Figaroa a destaca cu e tempo ey, Stichting End Child Abuse cu otro organisacionnan a entrega un documento cu varios sugerencia pa locual ta trata cambionan den leynan y maneho, “cu te dia di awe ni un parlamentario ni di oposicion ni di coalicion no a haci nada pa e topico di derecho di mucha of abuso sexual. P’esey mi ta pidi pueblo pa ta critico, pasobra awor nos ta bay wak con politiconan ta bay sali di forma populista pa gaña y kisas otro aña nos lo tende cu Evelyn ta bay bini cu e ley di seis minuut, ta algo cu el a priminti y esaki ta cosnan importante pa pueblo cuestiona parlamentarionan tambe, pa nan haci nan trabao.” El a bisa.

Di loke ta trata e carta pa presidente di parlamento, Figaroa a señala cu nan tin e documentonan y Figaroa ta puntra kico Vrolijk a haci te awe, con a percura pa den e comision di asuntonan social pa invita e Stichting of yama esnan cu tin mas conocemento riba e area aki pa wak, por ehemplo, kico ta e retonan? Figaroa tin speransa di haya algun contesta di Vrolijk maske el a sigura cu “mi no tin mucho confiansa den dje, pasobra e agenda cu e ta hiba ta e agenda di MEP y no esun di e bienestar general. Pero mi speransa ta pa e fraccion di partido RAIZ cu ta sostene e coalicion por haci un cambio aworaki.”

Tambe, Figaroa ta spera cu parlamento por yama e minister concerni, esta Rocco Tjon, pa e por splica su maneho di kico e ta bin ta haci como gobernante cu ta responsabel pa e topico riba derecho di mucha y abuso di mucha pa pueblo por haya un tiki mas di clarificacion.

Den Aruba su historia politico, manera Figaroa ta sigura, nunca antes den 10 aña aki parlamento no a haci uso di su derecho di encuesta, loke ta trata un investigacion y cu esey parlamento ta trata un rapport si por ehemplo, tin iregularidadnan mester entrega esey na Ministerio Publico, pa e motibo ey Figaroa a bisa cu nan a pidi na presidente di parlamento pa tambe institui un comision pa haci investigacion ariba e aspecto di derecho di mucha, unda nos ta ? kico nos ta haciendo? Y kico falta? Enfocando riba abuso di mucha unda por percura pa parlamento haci entrevista cu profesionalnan y traha un rapport pa bin cu sugerencia.

“Mi kier pa pueblo compronde cu pa mi e lucha di derecho di mucha y vooral e topico di abuso sexual ta un topico pa mi hopi na mi curason y e compromiso cu mi ta haci na pais ta cu si PDP por haya representacion den parlamento nos kier establece un estudio parlamentario ariba e punto aki di derecho di mucha” Figaroa ta señala.

Finalmente, a manda un otro carta na prome minister cu e peticion pa plataforma Transforma Pais e cual a bin cu 10 punto specifico pa un dialogo nacional caminda Figaroa ta destaca e Landspakket y otro topiconan cu kier papia cu prome minister.