Politico Leonardo Figaroa a reacciona riba comentarionan di corant Solo di Pueblo, cu a critica su ponencia den un remitido anterior, den cual Figaroa a propone cu gobierno mester duna retiro na 2mil ambtenaar.

Tocante e propuesta di Figaroa, Solo di Pueblo a comenta: “E pregunta clave cu Figaroa no a splica ta: Unda e ta cuminza? Na cual departamento? Y con e ta bay tene e aparato publico pa sigui duna servicio?

Tin ves ta facil pa papia coy loco, of mihor bisa; Ora bo ta pafor di Gobierno, tur cos por!”

Riba esaki, Figaroa a reacciona bisando:

Mi a drenta politica pa participa na e plataforma mas grandi cu tin na Aruba. Eleccionnan di 2025, pa por ta un simbolo di innovacion pa e hoben studiante, hoben empresario, comercio, tatanan y mamanan di famia, pensionado y Aruba completo. E ta exigi di mi como politico pa cada biaha busca hopi bon pa sa kico mi ta papia ariba dje. Esaki ta un tema cu pa mas di 5 aña mi tin ta prepara mi mes. Pa mi politica ta un arte bunita unda dialogo ta e base fundamental, debate ta e instrumento pa nos por yega na proposicionnan solido, realistico pa salvaguardia e interes y bienestar general di Aruba.

Trias politica y Prensa?

Na 2021 e tema di Trias politica tabata uno cu a bin ariba debi na e forma con no tur ora e la wordo bon splica. In “a nutshell” gobierno tin hopi poder cu Aruba su electorado ta duna gobierno door di vota durante eleccion. E voto ey ta e pilar fundamental cu nos leynan y democracia ta hustifica tur decision cu keda tuma,tur esaki ta regla den nos Staatsregeling.

– Parlamento ta legislador, esaki kiermen traha ley y tambe tin e tarea di keda supervisa gobierno, tarea controlativo. Paso parlamento ta representa Aruba, a nos ta vota pa e miembronan (21 pa ta exacto) traha den nomber di pueblo. P’esey capitulo 3, Staten.

– Articulo III.1 ta bisa: De Staten vertegenwoordigen het gehele Arubaanse Volk.
 -Gobierno tin e tarea ehecutivo, segun ley pa ehecuta locual parlamento bis’e. Esaki ta un discusion politico pasobra den realidad e no ta sucede, pero un articulo pa un otro momento.

– Door di e tarea compleho cu gobierno a haya primordialmente riba e tema di medio ambiente, derecho social y salubridad, gobierno tambe a bira un co-legislador. Pensa riba un landsbesluit cu ta keda firma door di Ministerraad (Conseho di Minister).

– Poder di huesnan, e organo hudicial ta unda e ciudadano por acudi si e ta sinti cu riba su derechonan a ser trapa. Nos tin huesnan imparcial y completamente independiente.

Esaki ta e famoso checks and balances cu tin cu percura cu e contract social cu ta e confiansa di pueblo den su representantenan ta wordo salvaguardia.

E di 4 poder den un estado di democracia

Prensa, prensa ta e voz di pueblo. Nan ta e personanan cu ta cana den pueblo, cu ta den cada momento cu pueblo y nan ta raporta y informa pueblo di Aruba tocante tur sucedido pa asina abo como ciudadano por sa kico ta pasando riba nos isla. E trabao di un periodista ta exigi cu e tin cu mantene su mes na e Global Charts of Ethics, esaki ta un total di 16 punto cu tin cu garantisa cu e trabao di periodistanan rond mundo ta confiabel.

Solo di pueblo su integridad ta 0.0

Ainda e lucha contra un plataforma cu ta defende e gobierno y cu ta pensa cu por trapa riba cualkier persona pasobra nan ta Solo di Pueblo ta continua. Nan sigur a bati na e adres bon robes. Como politico mi ta un hoben serio cu a drenta pa cambia mentalidadnan, propone e solucionnan dificil cu ningun otro politico kier papia ariba dje y percura cu den dialogo nos por yega na un proposicion concreto cu menos consecuencia negativo pa e interes publico. Cu Sr. Edmond Croes ta cambia e contexto di mi palabranan, sin puntra mi pa un reaccion, sin invita mi pa un entrevista pa asina mi por splik’e con nos ta bay yega na e cambio ambicioso aki, anto e ora ey mi lo por conclui cu no tin integridad den su persona. E lo por yama su mes un periodista? Mi ta curioso pa por wak ki diploma e tin y si e ta sigui manehonan internacional manera e Global Charts of Ethics. Un personahe populista cu tin cu sali na defensa di su gobierno, paso tin interesnan personal, economicamente mara tras di e gobierno aki.

Aruba nos tin cu exigi di tur hende pa nos tin nos normanan y balor in check, di prensa nos tin un tarea mesun cos cu nan ta controla nos como politico, pa señala informacionnan incorecto cu nan ta publica cu no ta cuadra cu e realidad. E lucha contra populismo ta continua, Aruba nos proposicion ta un contracto social politiea nobo. Nos ta keda positivo cu nos ta logrando nos obhetivo: Un dialogo nacional!

Pa cu esaki, e medio a reacciona bisando: “Relaciona cu su acusacion cu nos no ta cumpliendo cu standard di periodismo of decencia o etica di periodismo, nos no ta di acuerdo cune. Nos semper a mantene integridad y obhetividad den nos cobertura periodistico y nos no a cambia nada nada di su mensahe original. Nos a publica su punto number 1, intacto. Solo di Pueblo ta sigui comprometi pa duna noticia imparcial y nos ta invita Figaroa of cualkier otro individuo pa comunica cu nos si nan tin cualke preocupacion riba nos cobertura. Hunto nos por traha pa garantisa cu tur voz ta wordo scucha na manera husto y preciso.”