Aruba mi kier anuncia na abo cu entrante 8 di maart 2023, bo tin un organisacion politico nobo. E ultimo lunanan tabata un periodo dificil pa mi, pa motibo di e perdida di mi kerida mama. Despues di esaki, mi mester a puntra mi mes con mi ta sigui awo? sigui cu mi plannan of pone nan na banda un rato? Mi contesta tabata sigui, cu e determinacion pa mi sirbi mi pais.
Mi sa cu mi por sirbi mi pais solamente riba un partido cu tin idealnan social liberal-progresivo, enfocando riba brinda hobennan y e siguiente generacion cu un espacio pa por sinta na e mesa rondo. Aruba mi trabao ta cuminsa, e caminda pa mi por haci realidad e vision cu mi tin pa Aruba. Mi kier brinda e solucion y e sentimento di seguridad pa e hobennan studiante, clase trahado y pensionadonan. Mi vision ta basa ariba crea mas lidernan, stimula participacion y crea un espacio pa pueblo por conecta bek cu politica. Mi kier Aruba por forma parti di e dialogo, pa por yuda crea un vision cu perspectivanan nobo.
Aruba mester vision nobo!
Mi ta kere firmemente cu e solucionnan cu Aruba tin mester solamente e generacion cu un vision nobo por contribui na crea esakinan. Durante e ultimo 23 añanan nos a brinda espacio na AVP & MEP pa por dirigi nos pais, lastimamente ambos su resultadonan no ta mucho distinto. Awe tin un pobresa nobo ta reina, e clase medio a disparce, nos sistema di salubridad publico no por carga tur e retonan y nos enseñansa mester perspectiva nobo pa por brinda e lidernan den desaroyo un curriculum riba nivel di siglo 21. Unda esaki lo crea un conexion entre e suministro academico y nos mercado laboral. Mi kier mira un gobierno cu un plan proactivo riba e tema di medio ambiente. Nos Dump y sistema di desperdicio di sushi ta sclama pa un solucion concreto.
Durante mi 18 luna di reflexion mi a usa e tempo pa pensa riba e consehonan cu mi a ricibi di mi votadornan. Paso cada un comentario mi ta tuma den consideracion y cada un comentario tin un balor. Mi a haci caso na mi votadornan y a acepta cu Accion21 no tabata e organisacion politico cu ta pas cu mi idealnan mas. Pero awe mi kier enfoca ariba e futuro y cual impacto mi kier laga atras pa Aruba. Mi ta kere cu nos gobierno falta vision y tambe direccion pa por yuda e ciudadano. Mi kier contribui na un politica nobo, misa cu hopi hende ta sinti nan mes desconecta, principalmente den nos sistema politico pero mi kier traha incansablemente pa demostra Aruba cu e futuro generacion si kier hiba un politica basa riba contenido y compromiso cualitativo pa alcansa e miho solucionnan pa nos tur.
Kico ta haci mi partido diferente?
Primeramente mi escogencia di e estilo pa lidera e partido. Mi ta opta pa duna e poder bek na cada miembro di nos organisacion politico. Na final di dia un partido politico tin como entidad huridico e status di un “asociacion”. Nos kier pa miembronan por participa den e dialogo, vota riba tur proposicion cu nos partijraad ta trece dilanti y traha duro pa duna contenido na nos meta. Mi kier crea lidernan, mi ta kere cu cada individuo tin un cualidad. Mi ta kere cu tur ciudadano di pais Aruba ta suficiente inteligente pa por ricibi tur e informacion y por forma parti di un forma constructivo na e dialogo, pa hunto nos crea un programa di partido cu como punto di salida ta: solucion.
Segundamente, mi kier hiba un campaña cu tin como punto di salida: principionan di nos organisacion politico. Mi kier crea un forum politico unda hunto abo como miembro por participa, cuestiona, wordo informa y educa bo mes pa asina abo por compronde e topiconan y vota conscientemente.
Finalmente, mi kier gradici tur e personanan cu semper a sa di sostene mi. Awe mi ta haci un peticion na abo pa un biaha mas forma parti di e vision pa crea mas lider, pa conecta e progreso. Mi kier drenta den dialogo cu bo Aruba, mi kier scucha tur e retonan cu abo ta enfrentando diariamente, mi kier brinda bo cu e oportunidad pa bo comparti cu nos tur e retonan ey. Pa na final hunto cu bo crea un programa di partido cu bo por ta orguyoso di dje pa asina nos por bay e eleccion y causa un impacto pa drenta den e proximo gobernacion. Aruba esaki ta bo oportunidad pa forma parti di forum, unda intercambio di pensamento, dialogo y debate lo resulta den solucionnan concreto. Nos ta un forum politico, mas cu un plataforma politico. PdP ta deriva for di e punto di salida cu nos kier traha pa Aruba, e interes y bienestar general mester prevalece.
Aruba ban hunto crea un direccion nobo, crea lidernan y conecta cu otro, paso e comentarionan constructivo ta primordial pa nos. Ami, Leonardo Figaroa ta spera di por conta cu bo.
