Leonardo Figaroa no ta descarta su participacion den proximo eleccion cu otro partido

Leonardo Figaroa ken ta un lider hoben den politica y cu dianan pasa a gradua como Bachelors den Ley na Universidad di Aruba, recientemente a tene un entrevista cu Bon Dia Aruba, mirando cu eleccion ta dia 6 di december y asina trece dilanti si e ta bay continua den e caminda di eleccion of lo prefera di warda un poco mas.

Manera ta conoci, Figaroa na aña 2021 tabata candidato riba lista di partido Accion21 di e cual el a dicidi di distancia su mes y asina ey a cuminsa forma su partido yama Partido Direccion Politiea (PDP) sinembargo, dia 9 di september Gabinete Wever-Croes II a dicidi di entrega su retiro lo cual a bira un reto pa Figaroa, como por ehemplo, e hecho cu candidatonan cu tabatin na e momento ey riba lista a dicidi di no continua den e caminda di eleccion aki, pa motibo cu nan no ta sinti nan mes bon prepara debi na e corto tempo pa haci campaña.

“Pa ta hopi honesto e aspecto di preparacion tabata biniendo den agenda, pa prepara e candidatonan pa siña kico ta nos leynan constitucional, kico ta e base huridico cu tur hende mester sa vooral ora di drenta politica, esey tabata e prome motibo,” el a bisa.

Di dos punto cu a trece dilanti ta cu for di su punto di bista personal, ora el a papia cu hopi hende pa busca conseho “huridicamente lo por participa den eleccion aki cu mi mesun partido, pero e realidad ta cu mi tin cu pensa no riba mi mes, sino riba un pueblo. E ora ey e mensahe di bay mi so riba un lista, mi ta sinti cu algun prensa lo bay cuestiona mas e hecho cu mi ta bay mi so cu nan lo kisas lo worry di berdad kico ta e ideanan cu mi tin. Esey ta un di e preocupacion cu mi tambe tabatin pasobra mi a experienci’e den e campaña den 2021 ora na hopi caminda hende tabata puntra mi riba mi edad.”

Ademas, el a conta cu na momento cu gobierno a cay, su tata a bira malo unda esey a afecta Figaroa hopi mes “mi tata ta mi weso di lomba” unda e mester a bay reflexiona si e ta continua cu su partido na e momentonan aki of no, “hasta na varios ocasion mi a acerca otro politico for di algun luna pasa pa por a yega na un tipo di lista combina, pa por tin un aliansa pero lo cual mi ta siñando como politico cu ta papia algo pafo di ta unidad, na final bo ta wak cu nan kier ta e number un. No tin espacio pa bisa laga nos bay negocia, pa wak nos por cera un aliansa y pa mi ta hopi honesto cu bo, mi no ta bay uni na otro partido si no tin un garantia pa mi,” el a sigura.

Figaroa a declara cu loke el a experiencia na Accion21 den ultimo eleccion ta cu “a mi nunca a papia riba dje, pero e tabata un impacto hopi grandi y e tabata e motibo di pakico mi a funda un partido, pasobra na final di dia bo no kier wordo usa y despues tur e trabou duro cu bo a hinca, ta wordo manera menosprecia. Politica ta hopi bunita di pafo cu su marketing, pero di paden, den e organisacion bo ta wak cu tur ora e cosnan no ta cana manera mester ta. Esey tabata un drempel pa mi y mi a haya hopi oferta den ultimo dos siman aki.”

Pero den su pensamento e ta sigura cu ”mi no ta bay ataca ni un hende pa algo cu a pasa den pasado pa mi sinti bon” esey tabata e motibo dicon el a bandona e partido ey cu un carta y no a duna mas detaye di kico a sucede na e momento ey.

“Mi preocupacion mas grandi e tempo ey tabata mi votadonan, pasobra mi a sinti cu mi a laga nan na caya, mi a campaña bisando nan cu esaki tabata un partido nobo y tabata un alternativa anto despues faltando un siman di eleccion bo ta wak cu Daphne y a mi a sali pasobra tabatin hopi cos cu a pasa cu hende no sa, bo a falta nos respet pa tur lo cual nos a haci.”

P’esey el a dicidi di funda partido cu no ta solamente un partido pa bay eleccion manera Figaroa ta sigura, pa motibo cu nan vision como organisacion politico ta cu nan tin metanan of statuutnan cu lamentablemente door di tempo y retonan di hende cu tabata yuda e partido cu mester a bandona directiva, e no a haya e oportunidad di por a duna por ehemplo, curso pa eleva e consciencia di Aruba na ora di yega na un urna electoral.

Tambe, el a splica cu awor e ta hasta a bin hayando oferta di hendenan cu kier tuma su partido over, hendenan cu kier a cumpra su partido, hendenan cu a puntr’e pa uni na nan lista, hendenan cu a puntr’e si kier haci un lista combina, “pero den e caso aki pa crea un lista combina cu e partido aki, mi no tabata sinti mi mes hopi confortabel pa algo cu a pasa den pasado pa entretene e idea ey di por haci’e cu e partido ey.”

Pero te ainda, e no a yega na palabracionnan concreto pa por uni na un di e partidonan cu a ofrece un oferta pe “pasobra ta algo importante pa mi por sa si mi ta bay sostene bo riba un lista, ki tipo di lider bo ta, esey mi a siña cu Accion21 y di dos punto e contenido, pasobra pueblo sa cu mi tin 18 luna ta profila y a formula ya caba un framework di kico como politico a mi ta kere y kico mi kier haci pa Aruba,” el a expresa.

Te awor, Figaroa ta sinti cu no tin un alternativa pero e no ta descarta e idea pa motibo cu tabatin algun intento y e no a haya un contesta “kiermen mi ta wardando wak si lo mi haya un respuesta si of no, pa prome cu 18 di october dicidi si nan lo bisa mi cu nan kier wak mi riba nan lista y cu mi ta sinti mi tambe respeta. Pasobra mi no ta djis un politico hoben manera tur hende ta pinta mi, mi ta un adulto di 23 aña pero mi tambe tin mi ideanan, mi vision y awor cu mi ta hurista, mi tin mi elementonan di conocemento cu mi ta bay trece den e organisacion politico si mi lo drenta eynan, mi ta kere esey lo wordo balora.”

Riba e pregunta con factibel su participacion pa eleccion aki ta riba un otro lista, el a sigura cu “80% factibel pero e mester ta riba un lista corecto.”