(NLTimes) – Actor Leonardo DiCaprio ta invirtiendo den e compania Hulandes, Mosa Meat, cu a desaroya tecnologia pa crea carni como un alternativa pa mata animalnan.
E Mericano ta mira carni di laboratorio como un solucion pa cambio climatico, pasobra e ta conduci na hopi menos emision di gasnan di invernadero compara cu cria di animalnan. DiCaprio tambe ta inversionista den Aleph Farms, un compania Israeli cu tambe ta trahando riba carni di laboratorio.
Ningun di e companianan a revela cuanto capital e ganador di Oscar ta poniendo den Mosa Meat y Aleph Farms.
DiCaprio pa largo a defende e lucha contra cambio climatico. Mantene y mata baca, porco y otro animal pa consumo di carni ta un fuente mayor di gasnan di invernadero. Door di cambia esaki, por gana den clima, e actor a pronostica. “Un di e formanan cu mayor impacto pa combati cambio climatico ta transformacion di nos sistema di cuminda. Mosa Meat y Aleph Farms ta ofrece formanan nobo pa satisface e demanda mundial pa carni, mientras ta resolve algun di e problemanan mas urgente di e produccion industrial di carni”, segun a splica DiCaprio, kende awo tin 46 aña di edad.
Funda na 2016, Mosa Meat ta un spin-off di Universidad di Maastricht. E compania ta traha carni usando solamente algun cel animal, cu despues ta cultiva pa crea carni. Investigador Mark Post, co-fundador di e compania, a genera titularnan na 2013 cu e presentacion di e prome hamburger cultiva. A costa 250mil euro e tempo ey pa trah’e. E meta awo ta pa haci burger cultiva pagabel pa consumidornan.
Mosa Meat a colecta aproximadamente 82 miyon euro di capital den varios ronda di inversion. Otro inversionistanan conoci ta inclui Jitse Groen, CEO di compania di delivery di cuminda Just Eat Takeaway, y Nutreco, e productor di cuminda pa baca y pisca.
