Statutonan di e compania no ta permiti ni maneha incinerator ni procesa sushi

Con por a duna un hindervergunning, e permiso pa molester na December 2020 caba, mientras cu e publicacion a sali apenas na Mei ultimo. Esaki ta un di e preguntanan cu Parlamentario Independiente Daphne Lejuez a haci na Prome Minister Evelyn Wever Croes, kende ta e Minister encarga cu Ordenanza Teritorial, Infrastructura y Medio Ambiente.

E pregunta ta pasa riba informacion cu DOW otorga e hindervergunning pa uso di incinerator na Parkietenbos y cu Caribbean Trucking Company, CTC, ta haya e encargo pa kima resto di sushi sanitario (slib di riool) den e mesun insinerado aki. Ayera Parlamentario Lejuez, haciendo uso di articulo III.17 di Constitucion di Aruba y articulo 59 di e Reglamento di Ordo di Parlamento di Aruba a manda un serie di Pregunta pa Sra. Wever Croes.

Cuanto a aloca pa CTC

Daphne Lejuez a puntra Prome Minister cua ta e suma cu ta mara na e acuerdo cu a cera cu CTC pa kima e slib y si a presupuesta e suma aki riba presupuesto di DOW. “Mi lo kier sa di Minister bao cua post e gastonan aki ta cay.”

E hindervergunning ta duna na nomber di Director di DOW, ing. Marlon Croes. E permiso pa molester aki ta mara na persona y actividad. Como tal, Lejuez kier sa con CTC ta huridicamente permiti conforme e permiso aki, pa opera e insinerado.

Tambe e Parlamentario kier sa di mr. Wever Croes si Minister di Husticia, pa medio di Direccion di Legislacion y Asuntonan Huridico, DWJZ y otro instancia di conseho, a evalua e experticio di tanto DOW como CTC ora di a otorga e permiso di molester. Lejuez kier sa cua ta e metodonan di evaluacion y kier sa detaye di consehonan ricibi y di cua instancia. “Parlamento lo kier ricibi copia di e hindervergunning en cuestion.”

Caribbean Trucking Company

Mas ainda, Parlamentario Lejuez kier pa Prome Minister den su encargo como Minister di Infrastructura y Medio Ambiente, entrega prueba unda ta mustra cu CTC tin suficiente conocemento, experticio y capacidad pa procesa e slib via e incinerator y opera esaki debidamente. Consecuentemente, kier haya di Sra. Wever Croes e pruebanan por escrito, sea ta certificado cu e personal di CTC a sigui un preparacion debido. “Si ta asina, por duna copia di esakinan.”

Daphne Lejuez ta puntra si mr. Wever Croes ta na altura di e obhetivonan statutorio di CTC como compania y si ta asina, e mester por sa cu e compania cu tin su statutonan registra na Camara di Comercio no ta autorisa pa procesa sushi, slib ni ta permiti pa maneho un incinerator.

“Minister Wever Croes ta na altura di mal prestacion di CTC na Sero Teishi, precisamente pa motibo cu e compania no tin experticio den procesamento di sushi? Y netamente pasobra cu no por a cumpli cu trabao, mester a cera un contrato nobo cu Ecogas despues di e caso K.G nr. AUA202000307.”

Caso Balentina

Ta trata aki di e caso cu ciudadano mr. Anouk Balentina a lanta contra DOW pa opera e incinerator. Den e caso sumario na Augustus 2020, Balentina no solamente a urgi Huez pa para operacion di e incinerator cu no tabatin su hindervergunning, pero tambe pa hala atencion na e forma indebido con CTC tabata hiba e maneho di procesamento di sushi na Ser’i Teishi. Sinembargo, e caso contra CTC no a continua pasobra a tuma decision pa no sigui cu e servicionan di e compania, cu tabata encarga pa hinca e baliñanan di sushi colecta pa Serlimar den e buraco na Ser’i Teishi. Tabatin hopi keho di e holo y molester di musca. Serlimar a pasa e tarea pa Ecogas, cu ya caba cu algun restructuracion pa minimalisa e molester.

Pero Parlamentario Lejuez kier sa por escrito, pakico, a pesar di e mal trabao y e hecho cu CTC no por a cumpli cu su obligacion den pasado, toch a bolbe cera otro contrato cu e compania. “Si e situacion bolbe bay robes, CTC lo ta para pa e dañonan y e compania tin suficiente solvabilidad pa paga, of e daño lo mester core pa cuenta di Pais Aruba pa medio di DOW?”

Consecuentemente, Lejuez kier mira e copia di e contrato entre Pais Aruba y DOW, cera cu CTC y cu esaki por bay Parlamento.

Pakico no DOW, sino CTC

Lejuez kier wak tur e contractonan cu Serlimar tin na e momentonan aki cu CTC, y si Pais Aruba pa medio di DOW tin contacto cu CTC, y den cuadro di transparencia y bon gobernacion, entrega copia di e contratonan aki na Parlamento y splica, den caso cu no por publica e documentonan. “Minister lo por duna Parlamento un bista unda ta poni cuanto Serlimar ta paga CTC pa luna y pa cua servicio. Ta trata di servicionan cu Serlimar mes no por haci? Y pakico no por haci esakinan?”

E Parlamentario independiente ta pidi Evelyn Wever Croes pa splica Parlamento por escrito di con ambtenaarnan cu ta traha na DOW mes no por a keda certifica pa opera e insinerado, ya cu esaki lo tabata mas eficiente.

Daphne Lejuez kier contestanan por escrito di Prome Minister Evelyn Wever Croes den e periodo stipula pa e Reglamento di Ordo.