(AP)—E delegacion congresional Mericano a reuni cu e lider nobo di Taiwan dialuna den un muestra di sosten algun dia despues cu China a organisa ehercicionan militar rond di e isla auto-gobernante den un respuesta na su inauguracion.
Representante Andy Barr, e co-presidente di e junta politico Taiwanes den e congreso Mericano, a bisa cu Merca ta completamente comprometi pa apoya Taiwan militarmente, diplomaticamente y economicamente.
“No mester tin ningun duda, no mester tin ningun skepticismo na Merca, Taiwan of cualkier parti di mundo, di resolucion Mericano pa mantene e status quo y paz na Taiwan,” segun e republicano for di estado Kentucky na un conferencia di prensa den e capital Taiwanes, Taipei, despues cu e delegacion a reuni cu presidente Taiwanes Lai Ching-te.
China ta considera Taiwan como un provincia traidor cu mester bin bao di su control, por media di forsa si ta necesario. Merca, manera mayoria pais, no tin relacion diplomatico formal cu Taiwan pero ta obliga pa via di su mesun leynan pa provee e isla cu recurso pa defende su mes.
E gobierno Chines a expresa oposicion fuerte na e bishita congresional, bisando cu e ta balota e ta socava e relacion entre China y Merca, y paz y stabilidad na Taiwan, referiendo na e caminda maritimo entre China y Taiwan.
E bishita di cinco dia di e legisladonan “a core contra e compromiso politico di gobierno Mericano pa mantene relacionnan no oficial cu Taiwan, mandando un mensahe seriamente robes na e forsa separatista di independencia Taiwanes,” segun e vocero di e ministerio di Asunto Exterior Chines, Mao Ning.
Ta anticipa cu Lai, ken a tuma e oficina presidencial un siman pasa, lo continua cu e politicanan di Tsai Ing-wen, su predecesor for di e mesun partido politico.
E minister di Asunto Exterior nobo, Lin Chai-lung, a tuma nota di e ehercicionan militar recien y a yama e bishita di e delegacion “un gestion importante di solidaridad” durante un tempo critico. E delegacion a inclui cuatro republicano y dos democrata y a ser lidera pa republicano Michael McCaul, e presidente di e House Foreign Afairs Comitte. Aña pasa, China a sanciona e republicano despues cu el a bishita Taiwan na april. “Merca ta y semper lo ta un partner confiable, y ningun forma di coercion of intimidacion lo retrasa of stop e bishitanan rutina pa e congreso na Taiwan,” el a bisa.
McCaul a cita aprobacion congresional luna pasa di un legislacion di ayudo militar pa Ucrania, Israel y Taiwan. China a opone Merca armando Taiwan, Mao a bisa.
E otro miembronan di delegacion tabata republicano Young Kim di California y Joe Wilson di South Carolina, y democrata Jimmy Panetta di California y Chrissy Houlahan di Pennsylvania.
