Recientemente Camara di Comercio di Aruba (KvK) a anuncia cu nan ta bay introduci un sistema di cobransa pa por tin acceso na e registro comercial online, cual a drenta na vigor desde 27 di maart 2024. Esaki a trece un ola di disgusto, confusion y cuestionamento di parti di sector comercial y comunidad di Aruba.

Abogado Lincoln D. Gomez a reacciona riba esaki publicamente a traves di un articulo den cual e ta cuestiona si e introduccion di sistema di cobransa nobo aki ta legal. Abogado Gomez a trece dilanti diferente articulo di ordenansanan nacional den cual ta señala cu no tin ningun caminda estableci cu tin base legal pa introduci un cobransa pa e registro online.

E abogado ta remarca cu e ley cu ta prescribi cu mester un LBHAM pa por cobra pa servicio. E ley actual no ta cubri acceso online ni tampoco e cobransa di 30 florin pa un uitreksel di KvK na Ingles of Spaño, entre otro.

Segun articulo 15 di e Handelsregisterverordening AB1991 no. GT 15 paragrafo uno, prome cu e inscripcion di un negoshi, filial of branch adicional, y despues di e aña di inscripcion anualmente, e suma menciona den e di tres y cuater kolom di e tabel 1, por ser cambia pa medio di un besluit di gobierno cu te tene na medida general.

Articulo 17 di e mesun verordening ta indica cu tur cos cu tin di haber cu e forma y supervision di e registro comercial, e informacion pa e inscripcion, e inscripcion mes, e eliminacion, e suplemento y cambio di e informacion registra y e provision di copi y extractonan di informacion cu ta inscribi, e suma di placa pa tur e cosnan ey y e otro cosnan necesario pa e implementacion di e reglamento di estado aki, ta ser regula pa medio di un besluit di gobierno cu ta tene na medida general, pasobra nan no ta dispone den e reglamento di estado aki.

Articulo 19 paragrafo uno ta resalta cu e secretario di Camara di Comercio ta encarga cu e supervision riba e cumplimento di e disposicion cu ta stipula den of pa forsa di e reglamento di estado aki.

Handelsregisterverordening AB1989 no. GT 87 articulo 19 paragrafo uno ta remarca cu e secretario ta duna na cualkier persona cu ta desea esaki, copia autentico y extracto pa un costo di Afl. 15,-. Cu aprobacion di Camara di Comercio, si e solicitante no tin obhecion contra esaki, reproduccion fotografico por ser duna na luga di un copia y e suma cu mester paga pa esaki ta Afl. 3,- pa pagina.

Paragrafo dos di e mesun articulo ta indica cu notificacion por escrito cu un negoshi of un hecho ta of no ta inscribi, ta ser duna pa un suma di 50 cent. paragrafo cuater ta señala cu e suma di e compensacion ta ser nota riba e extracto of e copia. Paragrafo ocho ta resalta cu den interes di e servicio di Estado, informacion segun menciona den e prome y di dos paragrafo di e articulo ta ser duna gratis.

Abogado Gomez ta subraya cu den e articulonan di e ordenansanan nacional no ta aparece cu ta legal dentro di e cuadro di ley pa Camara di Comercio cobra pa acceso online di e registro comercial. Mescos cu e ta remarca cu e cobransa di Afl. 30,- pa extracto na Ingles of Spaño tampoco ta aparece den e Handelsregisterverordening.

Mirando e cantidad grandi di reaccion cu e noticia aki a causa, Camara di Comercio a tene un conferencia di prensa pa aclaria e situacion y trece claridad den henter e asunto aki.

Director di Camarca di Comercio, Martijn Balkenstein, a indica cu KvK kier clarifica pakico nan a haci esaki y kico ta e legal pa nan haci esaki.

Segun Balkenstijn a splica, e registro comercial online aki ta un servicio adicional cu KvK ta duna y no ta un obligacion pa ley y ta algo cu nan a haci pa comunidad por tin un servicio mas comodo pa haya datonan, algo cu nan ta considera hopi importante. Ademas, el a indica, esaki ta un sistema cu ta funciona banda di e registro di papel cu nan tin unda tur persona por solicita esey di manera gratis na KvK.

Costonan di operacion di KvK a subi door di inflacion, pero tambe door cu nan kier brinda un

servicio adicional pa tur hende y p’esey nan a cuminsa cobra un fee pa e registro online riba

nan website. Ademas e institucion a trece dilanti cu e ta un paso necesario pa por proteha e datonan y mantene e sistema sostenibel y duradero.

Pa loke ta e costo extra di extractonan den otro idioma, e director a agrega cu e no ta un obligacion legal di KvK pa ofrece traduccionnan di extractonan, pues e ta un servicio adicional cu tin costonan adicional y pa es motibo, e traduccion di extractonan ta costa mas cu 15 florin manera ta stipula den ley. E costo adicional ta pa cubri e gastonan di traduccion.

Balkenstein a subraya cu segun e ‘Landsverordening op de Kamer van Koophandel en Nijverheid’ (AB 1990 no. GT29), KvK por cobra sumanan adicional pa e servicionan extra cu KvK ta brinda, entre otro, por cobra un suma pa consulta e registro comercial online, y un suma adicional riba e tarifa di 15 florin stipula den ley pa e traduccion di e extractonan.

Por ultimo, e director di e institucion a indica cu nan no a anticipa cu ta bay tin pregunta ariba e introduccion di e sistema aki mirando cu na Hulanda, Boneiro of Sint Maarten, por ehemplo, e Camara di Comercio tambe tin e sistema di cobransa aki. El a resalta cu ademas e suma cu Camara di Comercio di Aruba ta cobra ta mas abou compara cu e Camara di Comercio di Hulanda, Boneiro of Sint Maarten.

Reportera di Bon Dia Aruba a tuma contacto cu minister di Economia, Comunicacion y Desaroyo Sostenibel pa puntra si Camara di Comercio por restringi e acceso na e registro comercial online y si nan tin un base legal en berdad pa introduci e sistema di cobransa pa por tin acceso na e registro comercial online. Te cu ciere di nos edicion no a logra haya contesta di e minister ariba e preguntanan aki.