Ayera mainta durante un conferencia di prensa, Terrance Ras di Leap of Faith Foundation a presenta e prototipo di su proyecto Leap of Faith, cual ta un pier pa hendenan cu limitacion por drenta lama y haci terapia pa yuda nan mehora y hasta cana back.

“Mi kier bisa pueblo cu mi a cumpli. Mi a priminti cu nos ta bay cuminsa cu e proyecto y awe mi ta present’e na boso. Mi deseo ta pa hendenan cu limitacion experiencia locual ami a experiencia. Mi por a cana back door di bay constantemente den awa”, Ras a expresa.

Ras, basa ariba su mesun experiencia, ta enfatisa e hecho cu ora e awa pasa e stoma bay ariba, e ta duna e mente paz y ta kita e miedo di duna e prome stapnan back. “Y esey ta e comienso.”

El a splica cu e pier ta bin cu ocho ekipo cu por conecta na e pier pa haci diferente tipo di ehercicio. Asina e terapistanan cu kier haci uso di e pier pa terapia, por saca e hendenan y yuda nan cu nan les di terapia den awa.

Na comienso el a bin cu e idea di e proyecto aki keriendo cu Aruba tin menos cu 100 hende riba rolstoel, pero despues, a traves di investigacion el a haya sa cu nan ta riba cuater mil hende cu ta riba rolstoel cu algun tipo di limitacion.

“Nos tin cu compronde cu nan ta cuater mil hende cu no ta sali for di cas, cuater mil hende cu conoce tur programa di television cu tin, cuater mil hende cu tin herida na nan lomba door di drumi constantemente riba cama, cuater mil hende lubida, lastimamente. Aworaki mi ta duna nan e chens di sali back”, el a remarca.

El a sigui splica cu pa e funcionamento di e pier e tin mesun team y e tin e plan cla caba. E pier ta traha di tal forma cu e ta wordo desarma completo y por wordo carga facilmente pa pon’e den awa. E pier presenta ta specificamente traha pa wordo poni den e lama na Baby Beach.

Na mesun momento, Ras a remarca cu e pier no ta solamente pa hendenan local so usa. E ta pa crea un boost economico pa Aruba tambe, pasobra Aruba lo ta e prome luga cu lo ofrece algo cu lo por yuda hendenan cu limitacion cana back. “Ami mes ta prueba di esey.”

E idea ta pa e pier ta disponibel tur dia, y pa siman ta sak’e un biaha for di lama pa spuit y despues ta instal’e back den awa. El a subraya cu esaki no ta causa ningun daño na medio ambiente, ta djis saca, spuit y pone back.

Pa loke ta trata permiso di parti di DIP, Ras a indica cu ainda no tin permiso. El a splica cu el a manda varios e-mail caba, el a hasta a papia cu e director personalmente, pero e siguiente dia cu e mester a reuni cu e director, e no tabata t’ey.

“Nan a atende mi via e balie, pero mi a ripara cu e persona cu a atende mi no tabata na altura di e proyecto. Te dia di awe mi no a haya niun contesta, mi a manda varios e-mail, mi a tuma contacto cu Minister di Turismo pa wak kico nos por haci, pero te ainda nada”, el a agrega.

El a resalta cu e ta purbando di haci e cosnan manera debe ser, cana e caminda corecto, pero cu na Aruba tin un problema serio, cu San Nicolas semper ta wordo laga atras cu proyectonan pa DIP.

“E ta asina ki cu ami ta purbando di tur manera pa e bay, pasobra nos ta biniendo cu un proyecto cu lo haci un cambio grandi pa humanidad. Pero si no ta keda mi nada otro, lo mi mester yega un dia y djis pon’e den awa sin permiso.”

E proyecto aki, Ras ta enfatisa, ta algo cu no tin niun otro caminda na mundo y na momento cu turistanan wak esaki, cu nan sa cu personanan cu limitacion por bay den lama di Aruba, e lo ta beneficioso pa e turismo di Aruba.

E meta principal di Leap of Faith ta pa pone e piernan diferente caminda. “Mi kier pone rond mundo”, Ras a bisa. El a sigui splica cu ta importante pa personanan cu limitacion tin e pier mas cerca di nan tambe pa nan no tin cu bay hopi leu pasobra e ta costa hopi placa pa nan wordo transporta.

“E pier specifico aki ta traha na midi pa Baby Beach, pero un bes mi bay cualkier otro lama mi ta haci sondeo atrobe y mi ta traha un pier na e midi di e beach”, el a agrega.

Por ultimo el a indica pa principio di proximo aña e pier lo ta completamente cla pa pone den awa. Una bes esaki wordo traha di aluminiun y no di hero, e no ta frustia mas, no mester pinte tampoco y ta carge na man y hibe awa pasobra e ta bira light. Fin di januari mi ta desarme completo, welder e waterproof y despues busca e cinco mil florin cu falta pa spuit”, el a finalisa.