Latino America, cu Mexico como lider, ta mesun peligroso pa periodistanan cu Medio Oriente cu ta bati pa guera, Reportero Sin Frontera (RSF) a denuncia diamars ultimo den su balans di 2019, cu ta duna cuenta di 49 informador asesina rond di mundo, e cifra mas abou den 16 aña.
Cu 14 morto (10 na Mexico, 2 na Honduras, 1 na Colombia y 1 na Haiti), Latino America ‘ta keda particularmente un region instabil y peligroso pa e profesionalnan di informacion’, RSF a bisa den su informe, den cual ta alerta cu estadisticonan lo por sconde un realidad pio ainda.
“Otro 10 periodista a ser asesina na Brasil, Chile, Mexico, Honduras y Haiti na 2019” pero nan no ta figura den e cifranan di organisacion defensor di libertad di prensa, pasobra ainda mester verifica.
Mexico ta, pa leu, e luga mas peligroso pa ehercicio di periodismo.
Ademas di registra na 2019 10 asesinato di informado, mesun hopi cu den guera di Siria, e probabilidad cu e patrocinado di e asesinatonan aki lo ser husga ta casi nulo, pa motibo cu e pais tin un cifra di impunidad di mas di 90%, RSF a recorda.
Honduras, cu dos periodista asesina den pleno luz di dia, ‘tambe ta supera pa corupcion y crimen organisa’ y Colombia di nobo ta enfrenta su ‘demoñonan bieu’, despues di un descanso pa e firma di acuerdo di paz na 2016, RSF a constata.
Haiti cu a conoce un periodo largo di calma, a bolbe riba e pagina di informe di RSF na berano di 2018.
Otro riesgo pa e ehercicio di periodismo ta e censura cu hopi pais ta eherce, den particular China, cu a bira na ‘e mayor prizon di mundo pa periodistanan’.
Den total, 389 periodista tabata den prizon e aña aki pa eherce e derecho pa informa, 12% mas cu aña pasa.
