(Infobae) – Latino America ta bolbe domina e ranking di 50 ciudad mas violento na mundo segun e ONG Mexicano, Conseho Ciudadano pa Seguridad Publico y Hurisdiccion Penal.
E rapport ta indica cu e obstaculo mayor cu ta enfrenta na momento di haci e investigacionnan “ta e falta di transparencia di gobiernonan di varios pais cu ta inclui den e ranking”. “Pero cu e paso di añanan, cada biaha tin mayor transparencia den e mayoria di hurisdiccion, aunke den otronan tin retraso.”
E ONG a aclaria cu ademas den e rapport no ta inclui e ciudadnan di e paisnan cu ta padece conflictonan militar, como Siria, Sudan of Yemen: “Mayoria di e mortonan violento no ta coresponde na e definicion universal acepta di homicidio, sino na mortonan violento provoca pa operacionnan di guera (segun clasificacion di Organisacion Mundial di Salud).”
E datonan di e rapport ta bolbe genera alarma na Latino America, unda violencia ta sigui como e desafio mas grandi pa enfrenta. E caso di Mexico ta esun di mas preocupante ya cu, pa di tres aña continuo, e pais ta sigui como epicentro mundial di violencia homicida urbano cu ocho di su ciudadnan den e prome luganan.
Otro nacionnan Latino Americano cu presencia den e ranking aki ta Colombia, Honduras, Puerto Rico, Haiti, Ecuador y Jamaica. A exclui Venezuela pa falta di datonan, aunke a denuncia aumento di mobilisacionnan di parti di gruponan di narcotraficante y di guerrilla na e pais aki. Maske den a ranking no tin ningun ciudad Venezolano, E ONG Mexicano a aclaria cu no ta pasobra den e pais e violencia a desaparece, sino cu no tin un manera con pa nan por midi esey pa falta di transparencia.
