Latino America bibando e crisis di migracion infantil mas grandi na nivel mundial

(Newsweek) – Latino America y Caribe ta bibando un “di e crisis mas grandi y mas compleho” di migracion infantil na nivel mundial, cu cantidadnan record di muchanan cu ta crusa e puntonan principal di transito, segun UNICEF a señala ayera 7 di september.

25% di migrantenan di e region ta muchanan menor di edad, compara cu un 15% na nivel mundial, segun un rapport di Fondo di Nacionnan Uni pa Infancia (UNICEF).

Violencia, instabilidad y cambio climatico ta e causanan principal di e desplasamento di muchanan na Latino America y Caribe. Agencia pa Infancia ta alerta cu muchanan cu ta desplasa ta birando mas den edadnan mas chikito, na unda 91% di nan no ta yega na 11 aña.

“Cada bes tin mas mucha den movemento, di edad mas chikito. Tin biaha nan ta nan so y di varios pais di origen, incluso di luganan lehano manera Africa y Asia,” director di Unicef pa Latino America y Caribe, Gary Conille a bisa y ademas a adverti cu ora e muchanan ta crusa varios pais, tin biaha henter e region, nan por sufri di malesa, lesion, separacion familiar y hasta abuso.

Na Latino America y Caribe muchanan ta migrante cu cantidadnan record, nan ta desplasa principalmente na tres ruta: selva di Darien entre Colombia y Panama, migracion for di America di Sur y den puntonan di transito na nort di Centro America y Mexico, segun Unicef a informa.

Den sentido aki, e organismo a afirma cu e riesgonan fisico den e rutanan migratorio iregular ta innumerabel, specialmente pa e muchanan, cu ta atravesa selva, riunan, careteranan, poniendo den riesgo nan integridad, unda nan por bira victima di violencia, explotacion y otro situacionnan grave. “Incluso si nan ta yega na nan destino, nan bida ta keda den peliger,” Corille a sigura.

Den prome seis luna di 2023, mas di 40.000 menor di edad y hobennan a crusa e selva di Darien. Di su parti, Servicio di Aduana y Proteccion di Frontera di Merca, den prome semester di e aña aki a registra 83.000 menor compara cu 149.000 di aña 2021 y 155.000 di 2022. Segun e rapport, ta calcula cu entre 2014 y 2022 mas di 2 miyon persona a sali for di El Salvador, Guatemala y Honduras tanto pafo como paden di e region aki.