Diadomingo ultimo, Latino America a supera 100.000 contagio di COVID-19, mientras e number di mortonan ta ubica cerca di 5.000, di acuerdo cu e datonan aporta pa Universidad Johns Hopkins.
Brasil cu 210 miyon habitante, ta e pais mas afecta cu COVID-19 cu 38.654 contagio y 2.462 morto te ayera dialuna, aunke specialistanan ta calcula un number mayor di casonan debi na escasez di pruebanan cu ta realisa.
Peru cu 32 miyon habitante ta sigui cu 15.628 caso y 400 fayecido, Chile 18,7 miyon habitante, cu 10.088 contagio y 133 morto; Ecuador cu 17 miyon habitante, 9.468 infecta y 474 fayecido, y Mexico cu 126 miyon habitante, cu 7.497 caso y 650 morto.
E indice di contagio den e region tambe ta na aumento den paisnan como Republica Dominicana cu 4.680, Colombia cu 3.621 y Argentina cu 2.839.
Di su parti, Cuba a surpasa e cifra di mil, ora a suma 49 caso mas positivo diadomingo ultimo, pa un total di 1.035 na e pais, di acuerdo cu un informe di Ministerio di Salud Publico.
E cantidad di fayecido a ubica na 4.924, mientras cu na henter mundo e mortonan a aumenta pa 165.000 entre e 2.3 miyon di caso registra na nivel global.
Merca ta mantene como e pais cu mas personanan infecta cu 755.533 y tambe cu e indice mayor di morto cu 40.461. Sigui pa Italia cu 23.660 y Spaña cu 20.595.
E cifranan ey di casonan ta refleha un parti di e total di contagio debi na politicanan den diferente pais pa realisa nan diagnostico. Algun di nan por ehemplo, ta haci esey cu personanan cu mester un hospitalisacion.
