Laso comercial entre Republica Dominicana y Aruba a bira mas fuerte

E comerciante local, sr. Gregorio Burgos di Fruteria Santo Domingo ta un di e principal importadonan di productonan Dominicano. El a expresa cu e laso comercial entre Republica Dominicano y Aruba a bira mas fuerte.

“E importacion di productonan Dominicano pa Aruba a bin creciendo”, el  a bisa nan Bon Dia Aruba. Sr. Burgos a bisa cu e gremio di importado Dominicano ta bin haciendo esfuersonan grandi pa e productonan aki tan aprecia na Aruba y e islanan di nos region,  por ta presente riba nan mercado.

Sr. Burgos a declara cu nan ta importando productonan di primera necesidad y esaki ta un factor cu a faborece pa importacion fei Republica Dominicana por a aumenta. “Nan ta productonan cu berdaderamente  ta yena nos di satisfaccion di ofrece nan, pasobra nan tin bon demanda”, el a bisa.  Igualmente el a laga sa cu tanto fruta y berdura cu a pasa den proceso industrial tin un calidad halto.

Pa Semana Santa nan lo bin cu cantidad di producto Dominicano, entre nan producto seco cu nan ta distribui localmente den diferente negoshi. “Tur dia nos ta luchando pa wak con nos lo sali dilanti cu tur nos proyectonan di importacion”, segun sr. Burgos.

Transporte ta keda un necesidad

Sinembargo nan lo desea pa e actividad aki lo ta mas dinamico di loke awendia e ta. Un factor cu ta hunga un rol y cu tin su impacto tin di haber cu e deficiencia di transporte specialmente maritimo. Ya cu esaki ta e instrumento fundamental pa trece mercancia na bon prijs. “Esaki ta e problema cu ainda nos tin pa nos por competi berdaderamente cu un mercado asina cerca como esun di Venezuela”, asina e comerciante aki di origen Dominicano a declara.

Apesar di e limitacion cu ta existi riba tereno di transporte, nan ta haci tur esfuerso pa e productonan Dominicano por permanece riba nos mercado. Nan ta huur barco, tambe nan ta bin cu container di ta necesario. Como importador el a destaca e presencia di e linea aereo Dominicano PAWA cu ta facilita pa abastece nan di e vegetal di menos volumen of peso. Tambe nan ta trece carga den container haciendo uzo di un compania maritimo cu ta biniendo tur siman na Aruba.  E facilidad aki ta un ayudo grandi pa sigui amplia nan mercado ya cu antes nan no tabatin e tipo di transporte aki constantemente.  “Danki na Dios e porta ta habri y nos ta purba di introduci nos productonan.

Consulado Dominicano na Aruba a yega di informa cu su pais ta proximo  pa firma un  MoU cu Aruba cu lo yuda pa fortalece e relacion bilateral riba diferente tereno comercial y di cooperacion.