Durante un conferencia di prensa ayera tardi a tuma luga e lansamento oficial di e proyecto multidisciplinario “Pia Abao: Libera pa Conecta”. Jhon Freddy Montoya, lider di e proyecto aki a elabora ariba e meta di e proyecto y kico e proyecto “Pia Abao” ta encera.

Sr. Montoya a splica cu esaki ta un proyecto cu a inicia cu e meta di lans’e ariba e fecha di celebracion di dia internacional di dansa. Naturalmente e proyecto Pia Abou lo cuminsa na duna e prome stap di elaboracion di un investigacion y sensibilisacion pa asina ki por acerca mas tanto na loke ta e parti di suela, contacto cu naturalesa.

E idea tras di e proyecto ta pa cuminsa cu e elaboracion di un documentario pa presente durante un film festival cu lo ta dedica na e practica di diferente cunukero, piscado, artista, medico y otro profesionnan pa asina amplia e concepto.

Montoya a sigui splica cu lo traha tambe ariba un presentacion multidisciplinario cu un publicacion cu sabiduria acumula durante di e caminda cu diferente anecdota, poema y relato fotografico. Esaki lo finalisa cu un exposicion cu lo presenta tur e resultado acumula durante di e caminda di investigacion.

Durante e proyecto aki, Montoya e remarca, nan lo acerca diferente instancia entre otro Stichting Rancho, Museo Arqueologico, Parke Nacional Arikok y Aruba Art Fair, y lo traha den cooperacion cu proyectonan manera Caricia di e artista local Natusha Croes, ken lo tin ya caba un trayecto amplio di investigacion basa ariba e sensibilisacion di e caricia cu nos planeta tera, y Much’i Mondi.

“E deseo aki a nace di un inkietud di basta tempo cu ta draai den mi cabes pa realisa un buskeda propio pa encontra y reconoce mi mes pa medio di arte y haya riba caminda e manera mas artistico y pedagogico pa yega na otro y conecta cu nos suela di un forma mas consciente y directo pa hunto comparti tur experiencia acumula y crea un relacion mas sincero, natural cu otro, den un practica di contacto cu nos suela”.

Montoya a enfatisa cu como lider di proyecto el lo cana pia abao di un manera responsabel den e proyecto aki. El a splica cu el lo cana sigur mayoria di su parti como trahado, como persona cu ta eherce un profesion pia abao y naturalmente lo cana pia abao den diferente di e aspectonan di trabou.

Un acto simbolico a wordo presenta despues di e conferencia di prensa caminda diferente artista local a uni nan mes na e causa pa asina duna e prome stap cu ta kita sapato. Montoya a indica cu diferente di e artistanan aki ta personanan cu ta forma parti specialmente di un investigacion pa loke ta trata sensibilidad, exploracion, conocemento, caricia y tambe ta un acercamento cu planeta tera.

E proyecto Pia Abao kier crea un lenguahe unico y directo y un comunicacion mas estrecho cu tur obheto, suheto y elementonan natural pa por reconoce y biba di cada un di nan. Tur bida, color, magia, forma, misterio, dimension y tur rikesa agrega cu cada un di e elementonan natural aki ta posee y ta brinda den un forma unico y incondicional pa experiencia.

Pia Abou ta un practica comun, hopi usable y un forma di terapia cu ta yuda esun cu ta eherce hancra su mes cu e tera pa conecta y reconoce tur aspecto, sensacion cu esaki ta brinda e persona manera calor, friu, placer, emocion, ilusion, proteccion y inspiracion.

“Duna halanan na nos pianan, pone un rato nos sapato un banda y laga nan descansa. Cu nos plant’i pia duna sunchi na nos suela, laga lastronan di grandesa, noblesa,puresa, sensibilidad y bondad”.