Den e ultimo dos luna, nos por a tuma nota di e partido nobo Raiz cu a sali pero ainda hopi hende tabata puntra ta ken ta e caranan tras di e partido aki. Ayera finalmente durante nan prome rueda di prensa, e partido a haci su mes conoci na comunidad como grupo di hobennan lidera pa Ursell Arends y Tai Foo Benoit Lee.
Ursell Arends ta un hoben profesional di 36 aña cu a labora den sector turistico pa e ultimo dies aña. E ta operations manager di La Quinta Beach Resort y actualmente presidente di Aruba Timeshare Association. E tabata ocupa posicion tambe den Arubaanse Voetbal Bond caminda cu hunto cu un grupo di hoben nan a saca pais Aruba for di ultimo luga riba Fifa te na 120. Co fundado di e partido Tai Foo Benoit Lee tin 38 aña di edad anto a studia y traha na Hulanda pa hopi tempo. El a studia bestuurskunde y pa accountant tambe. Despues cu el a termina su estudio el a traha na diferente ministerio na Den Haag y tambe departamento di turismo di Corsou na Rotterdam. E cabayeronan a indica cu nan a studia hopi e proceso y historia di eleccionnan na Aruba. “Un parti hopi pret ta cu hopi partido den pasado no a haya e cantidad di voto cu e cantidad di hende cu mester bay firma, cual ta algo hopi straño.
Esey kiermen cu otro partidonan ta manda nan simpatisantenan vota”, sr. Lee ta comenta agregando cu nan no ta duda cu lo haya tur firma necesario pa por participa den e siguiente eleccion.
Politica tradicional
Durante e ultimo dos lunanan, nan a dialoga y combersa cu mayoria partido politico estableci. Pa medio di e combersacionnan aki, segun sr. Arends ta splica, nan a conclui cu nan vision y filosofia pa desaroyo di Aruba, no ta biba den partidonan politico tradicional. “Un vision cu kier uni un pais. Un vision cu ta para cu hunto nos por logra tur nos metanan. Y un filosofia cu nos famia a inculca den nos, ta cu si nos ta uni no lo tin nada pa preveni nos di logra nos metanan. Cu e mesun filosofia aki nos a bin ta prepara nos partido, nos movecion y tambe nos programa pa asina uni e pueblo di Aruba.” Raiz ta para pa un politica di union, transparencia y participacion di e pueblo, segun nan.
A tarda pa lansa
Sr. Arends ta bisa cu ta miho yega laat cu no yega nunca. Aworaki nan ta formando nan lista y tin casi dies candidato caba cu speransa di haya mas. Nan ta haci un yamada na esunnan cu ta sinti nan mes identifica cu loke Raiz ta para pe, ta mas cu bon bini pa join nan. “Nos a tarda mas pa lansa pasobra nos a percura di structura internamente manera debe ser. Nos tin un structura mescos cualkier partido politico grandi tin. ” Segun sr. Lee, nan a constata cu te ainda hopi hende na Aruba tin hopi miedo di join. Politica ta keda algo cu hopi hende lo tin miedo di dje.
“Loke ta sorprende mi ta cu nos a wordo adverti door di diferente politiconan estableci cu politica ta algo cu ta costa hopi placa y pa pensa si lansa of no pa via di esey. Ami ta kere firmemente cu placa no por impedi bo di haci algo cu bo ta gusta.” E ta haya cu riba un pais chikito cu politica ta wordo hiba den un forma tradicional/emocional y hopi agresivo, ta tuma hopi curashi y no placa pa por lanta un partido pa representa bo pueblo. “Mi ta haya tiki tristo si cu na aña 2017 esaki ainda ta un motibo pakico hende no kier join politica. Bo mester tin e capacidad, e gana y vision pa traha pa bo pais.”
Division den pueblo door di bandera y sticker
Un di e cosnan cu e partido kier cambia ta e division cu tin den pueblo crea door di politica tradicional. Nan a subraya e cantidad famianan cu no ta papia cu otro mas por ehempel pasobra di conflicto di interes politico. “Ta inaceptabel cu nos ta na 2017 y famianan mester keda sin papia cu otro djis pa via di nan color politico. Esaki ta locual nos kier para na Aruba. ” Nan ta enfatisa cu nan no ta bay uza bandera ni sticker of T-shirt y hiba un manera diferente y moderno pa campaña.
