Na sede di BEAM den centro di ciudad un grupo grandi di famia, amigonan di Michael Lampe hunto cu simpatizantenan di AVP a bini hunto pa su lansamento como candidato.
Esaki ta informacion for di relatonan di AVP. Sr. Lampe ta bin for di e bario di Savaneta, mescos cu su generacionnan anterior. E ta conoci artisticamente tambe como Fellow y creador di Datapanik y a studia composicion y produccion di musica na e Facultad di Arte, Media y Tecnologia na e Scol di Arte di Utrecht, Hulanda. Lider di AVP Mike Eman tabata presente na su lansamento. “Loke mi kier bisa ta cu ora mi a bira 20, 22 aña, mi a realisa loke Michael Lampe a realisa. Si bo kier rescata algo grandi, bieu den historia y parti di herencia di nos pais, bo tin cu conect’e cu e futuro pa e por sigui wordo carga pa mucho mas aña. Esey ta locual Michael Lampe ta haci pa arte y cultura di Aruba”, asina e lider a expresa.
