Ayera prome minister di Aruba, Evelyn  Wever-Croes como president di e comision cu ta percura pa reactiva comercialmente Caya Betico Croes, a dicidi di organisa actividadnan den cuadro di celebracion di Pasco y Aña Nobo. Esaki no lo cay den mano di e director di OBID cu ta e organisacion cu gobierno anterior a lanta pa maneha caya grandi, sino cu otro persona a wordo apunta. 

E mandatario a nombra Landy Croes kende lo percura pa trece actividad den caya. El a bisa cu sra. Croes kende ta un persona conoci ta gosa di e confiansa di comunidad. Ta asina cu ariba su mes el a yega di organisa durante aña algun di e actividadnan cu a ‘bira exitoso den caya Betico Croes, segun premier Wever-Croes.

Actividadnan
Sra. Croes a anuncia cu en conexion cu e fiestanan di Pasco y Fin di Aña ya caba tin actividad programa pa e fin di siman aki. Diabierna y diasabra awor lo tin un anochi di compras. Tambe diadomingo 24 di december Caya lo ta habri pa comunidad. Nan lo organisa un evento pa famianan pa bin disfruta di nan compras di Pasco, ya cu lo tin actividad pa muchanan y hendenan adulto.

Tambe pa dia 29 y 30 di december lo tin evento pa celebra e fin di aña aki.  Den curso di siman nan lo divulga mas informacion di e actividadnan aki. Un apelacion nan ta haci na comunidad di Aruba en general pa hunto trece e bida y ambiente cu nos a yega di conoce den caya specialmente den e dianan aki di fiesta.

Comision
E comision gubernamental di caya grandi ta consisti di seis ministerio y hunto cu ATA nan lo percura di bin cu actividadnan y trece bida den e area aki. E mandatario a aclaria cu e actividad aki no ta soluciona e problema cu caya grandi ta pasando aden, pero ‘ta simplemente pa aworaki ainda nos trece bida, nos ta trece actividad y mustra comunidad di Aruba con e cambio ta wordo sinti’. El a agrega cu e solucion structural pa Caya Betico Croes y area di centro di ciudad, nan lo concentra riba dje luna di januari venidero.

El a anuncia cu otro aña nan lo traha pa trece e cambionan necesario pa reactiva e Caya y e comision aki lo wordo amplia cu diferente departamento di gobierno. Di e forma aki, nan por atende cu e diferente pregunta riba con lo para cu e parkeer meter, si lo bin cu tipo di dak of parasol den caya, etc. E inkietud aki lo wordo atendi den consulta cu e diferente comerciante estableci den Caya Betico Croes.

Un preocupacion cu Bon Dia Aruba a trece dilanti tin di haber cu edificio bashi den caya, algun di nan den mal estado, con lo para cu nan. A pesar cu algun di e propiedadnan ta  priva pero tin tambe propiedad cu a deteriora y cu gobierno anterior a cumpra pa asina traha e ruta di e tram. E prome mandatario ta kere cu diferente cos por wordo haci riba e tereno aki hunto cu e minister di Infrastructura. Pero tambe cu e minister di Financia den caso cu mester duna algun estimulo  na e doñonan di e edificionan aki. Sinembargo el a prefera di no duna ainda detaye, te ora cu e comision mes ta cuminsa traha riba e asunto aki entrante otro aña.