Land Aruba a wraakt e hues y a para caso di Isla di Oro na corte

Despues cu un potret di un chubato riba un area protegi na Isla di Oro a bay viral na cuminsamento di luna di maart, Fundacion Parke Nacional Aruba (FPNA) a pidi un ordermatregel pa stop e trabounan cu e doño di e tereno a cuminsa haci na e rif mientras tanto y diabierna ultimo tabatin un kortgeding na corte di prome instancia unda Land Aruba a stop e caso pa motibo di desconfiansa den e hues.

Documento: https://drive.google.com/file/d/1VZK0ysAvtLMrRcLfl7VPN0AhUn96IupF/view?usp=sharing

Bon Dia Aruba a tuma contacto cu e abogado di Fundacion Parke Nacional Aruba, Zuhaila Arendsz ken a splica cu ta berdad cu e trabounan a para y na e luga a purba di traha un beach, a coba buraconan, a haci daño den diferente area y FPNA no tabata al tanto si e desaroyado tabatin permiso di gobierno pa haci e trabounan aki, pa motibo cu mester di un permiso pa haci esey.

Arendsz a informa cu diabierna 5 di april ultimo na corte durante e kortgeding a sali na cla cu e desaroyado no tabatin ni un tipo di permiso pa e trabounan, sino cu a pidi e permiso despues cu a haya e ordermatregel y eynan a constata cu e plannan tabata esey, ademas cu e desaroyado den un entrevista na otro medio local a señala cu nan kier a traha un beach, basha santo full ariba e rif, pone palapanan, mata di coco, haci un area caminda turistanan por bishita e luga aki.

Conforme ley, Arendsz a destaca cu e plannan ey ta den contra di e destinacion di e area unda tin tres factor cu ta hunga un papel importante como por ehemplo, ta un rif, ta un parke natural riba tera cu mangelnan y e otro parti rond di dje cu ta e area marino, lo cual ta nifica cu ta un area hopi importante cu mester haya proteccion, ademas ley ta indica cu den area tampoco mag tin ningun funcion pa actividadnan turistico of actividadnan comercial.

Ta un area cu mester ta conserva caminda por haci investigacionnan cientifico tocante e Parke Marino y di Biology, unda tin mag di tin cierto tipo di actividad cu no mag di haci ni un impacto riba naturalesa manera hendenan por snorkel of por pasa cu un kayak, pero ta cosnan cu tin un impacto hopi abou pa naturalesa.

“Naturalmente ora bo ta bay planta mat’i coco e no ta algo cu ta di naturalesa cu ta pertenece eynan y si ta pone palapa ta un impacto grandi, si bo tira santo blanco ariba riba un rif bo ta daña tur loke tin eynan y esey ta r inkietud hopi grandi cu FPNA tabatin pa cu e daño cu ta bay haci na e sistema ey cu ta hopi importante pa ecosistema di Aruba, pasobra ta un area cu tres diferente sistema biologico cu ta traha hunto y esey ta e caminda unda si bo ta afecta of mata un, bo ta mata tur e otronan y e ta un area cu door cu no tin ni un actividad, el a restaura su mes den un proceso cu tin mas cu 30 aña caba y cu ainda ta falta pa restaura, kiermen actividadnan comercial ta loke ta bay haci un impacto, p’esey e kortgeding ta importante.” Aredsz a señala.

Recientemente, FPNA a traha un video unda ta splica “E poder di 3” e importancia di e mangelnan, di yerba di lama y di e coralnan cu mester keda mantene di e forma ey, p’esey den e kortgeding di diabierna 5 di april a pidi pa hues ordena Aruba Ocean Villas (AOV), e desaroyado di e proyecto cu tabata tumando luga, pa no haci ningun actividad den area ey y tambe pa pidi hues ordena Land Aruba cu den caso cu AOV bay haci actividadnan eynan, pa para esey automaticamente.

E otro parti, manera Arendsz a informa tambe tabata pa pidi hues pa Land Aruba no duna e parcela aki back den erfpacht pa motibo cu e erfpacht di e parcela aki ta termina na 2026.

Di esaki, tambe Arendsz ta comenta e compania desaroyado di e proyecto tabata sa cu ta bay caba 2026, nan sa cu e tereno ta den un parti di naturalesa, cu ningun actividad comercial ta permiti eynan, “pero nan a cumpra toch cu e intencion di bay desaroya e parti aki, p’esey tambe tabata importante pa FPNA pidi e restriccionnan ey for di corte,” el a bisa.

FPNA den corte a trece su punto di bisa dilanti, Land Aruba su punto di bista tabata ta cu nan no por stop OAV di haci su actividadnan sino ta FPNA esun cu mester haciel’e, FPNA ta e entidad cu ta manage e area ey, sinembargo, pa ley nan no tin ni un autoridad pa stop un hende via un landsbesluit manera un polis tin’e.

FPNA a pidi Land Aruba pa duna nan e autoridad ey e cual nan tin añanan caba solicitando y cu esey nan por ehecuta nan funcionnan di management e parke di un manera mas efectivo pero, Land Aruba no kier a duna FPNA esey, e abogado Arendsz a comenta.

Tocante e punto di e parcela erfpacht, Land Aruba a señala cu nan no tin ni un intencion di extende e permiso erfpacht mas.

AOV su punto di bista tabata ta cu e tereno ta di nan, nan a cumpr’e erfpacht, cu nan tin derecho di ehecuta nan actividadnan na unda a sigura cu ta bay ta di minimo impacto pa medio ambiente, eco-friendly, cu palapan, mata di coco, solar panel, “den su perspectiva di bista, e ta haya cu esey ta suficiente pa no haci daño na e area, pero FPNA ta di opinion cu esey no ta e caso, e actividad ey no ta di minimo impacto, al contrario, ta haci hopi daño y FPNA a referi tambe na dos rapport cu a haci, un prome cu AOV a pone su bungalows eynan, con e area tabata y a haci un investigacion awor, unda bo ta wak cu e area unda e bungalows ta a wordo destrui completamente, full ecosistema ta bayendo atras cu stapnan hopi grandi, caminda ya e mangelnan a cuminsa bira menos, tin hopi algia rond pasobra e sistema no por limpia su mes, e PH di e awa a bira demasiado halto, bo ta mira cu e impacto humano tambe ta bay causa consecuencia na Isla di Oro tambe ora lo cuminsa haci actividadnan eynan,” el a sigura.

E caso aki di diabierna na corte a stop, debi cu e abogado V.M Emerencia di Land Aruba a sinti cu e hues A.H.M. van de Leur no ta imparcial y el a pidi pa wraakt e hues.

Segun e process verbal di e caso aki, cu Bon Dia Aruba ta dispone di dje e hues van de Leur referiendo na e parti cu Land Aruba a sigura cu nan no lo extende e parcela erfpacht na 2026, hues a declara cu “pa hopi biaha a experimenta y a mira cu Land Aruba ta tuma decisionnan contra ley.”

A base di e comentario aki, abogado Emerencia a señala cu “hues a mustra su parcialidad contra Land Aruba” y pa e motibo ey a pidi pa wraakt e hues van de Leur.

Awor e procedura di e caso a cambia, caminda tres hues ta bay den un wraking kamer pa wak e peticion di Land Aruba y den e caso cu wraking kamer ta haya cu e peticion di Land Aruba ta corecto of e hues pa un motibo of otro no por sigui cu e caso, nan lo kita e hues y e caso lo haya un hues nobo y lo cuminsa di nobo y e caso no lo sigui den etapa unda e ta awor.

Si no tin ni un motibo pa wraakt e hues, e caso lo sigui cu e mesun hues y den mesun etapa.

E proceso lo dura depende con schedule di corte ta pa cu esey, sinembargo, e ordermatregel ta permanece y AOV no mag haci ni un actividad mientras e proceso aki ta cana su caminda.