(prevention.com) – Manicure di gel por ta un opcion duradero pa huña, garantisando un color liber di chip. Pero investigacion nobo ta mustra cu manicure frecuente cu lampi UV por causa daño na DNA den man.
Un estudio publica den Nature Communications ta mustra cu haci bo huñanan regularmente, specificamente usando rayonan UV pa cura e manicure gel, por daña e DNA den bo man loke por conduci na cancer di cuero. Rayonan ultravioleta (UV) ta conoci pa causa cancer di cuero cu exposicion halto, y asina mes, tiki investigacion di seguridad a ser haci riba e lampinan.
Den un comunicado di prensa, investigadornan di Universidad di California San Diego a splica cu e aparatonan comun den salonnan di huña ta usa un spectrum particular di luz UV (340-395nm) pa cura e kimiconan den gel. Mientras “tanning beds” ta usa un spectrum diferente (280-400nm) cu estudionan a proba ta carcinogenico – esta, causa cancer – e spectrum usa den e lampinan di huña no a wordo studia extensamente.
Investigadornan a evalua tres poblacion di cel, incluyendo cel di cuero humano y tehido conectivo di raton pa evalua e efecto di e lampi UV di huña riba salud. Nan a descubri cu uso di e aparato pa apenas un sesion di 20 minuut a conduci na entre 20% y 30% di morto di cel, mientras tres exposicion di 20 minuut consecutivo a causa entre 65% y 70% di e celnan expuesto pa muri. Exposicion na luz UV mira den e estudio tambe a causa daño mitochondrial y DNA den e celnan restante y a resulta den mutacionnan cu patronchinan cu por mira den cancer di cuero den hende.
Mientras cu e resultadonan ta mustra e efectonan dañino di e uso ripiti di e aparatonan aki riba celnan humano, e investigadornan ta adverti cu ta rekeri un estudio a largo plaso prome cu yega un conclusion cu e mashinnan aki ta conduci na un riesgo aumenta pa cancer di cuero. Sinembargo, e resultadonan di e estudio tabata cla: uso cronico di e mashinnan aki pa huña ta daña celnan humano.
