Lamento conveniente no ta… Suficiente pa San Nicolas…

A surgi un discusion – atrobe – tocante e proximo ciere di un scol di educacion secundario na San Nicolas. Segun e mandatario responsable, esey ta necesario pasobra e scol – no publico – aki no tin e poblacion di e creencia ey pa mantene e scol. Tin parlamentario cu ta haya cu esey no ta un bon decision y ta boga pa busca un solucion di algun manera.

Tur esaki ta haci nos corda e discusion y protesta cu tabatin algun aña pasa, tempo cu e asunto aki a bin dilanti tambe. E ministro di e tempo ey a propone pa mantene e scol habri, bao di un fusion cu un scol publico. E protestanan contra e ministro tabatin efecto, no a tuma accion y awor definitivamente ta dificil pa hustifica cu ta mantene e scol habri. Nos no a scucha kico ta e proposicion di e apreciable parlamentario envolvi, pero ta parce dificil pa haci algo otro cu cera e scol. For di otro discusion cu tabatin un par di aña pasa, por conclui cu San Nicolas – entre scol publico y no publico – tin suficiente scol secundario pa atende e poblacion di San Nicolas. A proposito, e gran ausente den e actual discusion ta e sindicato di maestro cu na 2021 tabata asina fuerte den nan protesta contra e plan di e ministro di e tempo ey. Nos no a tende, ni e tempo ey y mucho menos awor kico por ta posicion di e sindicato awor.

Poniendo un banda un rato e discusion cu si tin un manera pa mantene e scol referi habri ainda, loke ta mustra nos penoso, atrobe, ta e falta di un discusion debido tocante e maneho general cu mester hiba den enseñanza, tumando na cuenta e realidad socio-economico di e ciudad y su alrededor. Na muchisimo oportunidad nos a trece dilanti e miseria economico cu San Nicolas a pasa aden den ultimo 40 aña, pa cual ni awe nos ta mira un solucion. Pero nos ta laga e discusion ey pa otro dia. En todo caso, pa loke ta relevante den e asunto aki, por referi na e hecho cu San Nicolas a perde poblacion den e ultimo decada. Esaki segun comparacion di e cifranan di Censo 2010 compara cu Censo 2020. Na 2010 a registra 15.284 habitante mientras cu na 2020 a registra 14.175 habitante na San Nicolas. Interesante ta cu e poblacion di San Nicolas Sur a crece den e 10 añanan ey, cu mas di 600 persona. Un aspecto cu merece mas estudio si nos tuma na cuenta cu e parti aki ta contene e barionan cu mas a sufri di e deterioro economico di ultimo decadanan. En general nos por bisa cu San Nicolas a bira e refugio pa esnan cu entrada mas modera, cu e desbentaha cu e lugar di biba aki ta keda mas leu for di e parti pabao unda mayoria di empleo ta situa. Aki nos por mira den practica loke nos por mira na hopi otro pais tambe: mas leu di e centro di desaroyo bo ta, mas leu di empleo bo ta biba, menos ta paga pa vivienda pero mas ta paga pa transporte, y menos bon e infrastructura socio-economico ta. Esey ta talvez e splicacion pakico hustamente den e barionan mas deteriora e poblacion a crece?

Banda di tur esaki, tabatin otro desaroyo tumando lugar y esey ta cu e gruponan di creencia protestant a bira hopi mas chikito. Den curso di e mas di 40 aña di atraso constante di e ciudad a tuma lugar un exodo grandi di e generacionnan mas hoben, mientras e generacion di mas edad cu a keda ta birando un grupo cada vez mas chikito. E repoblacion cu a tuma lugar na San Nicolas ta mayoritariamente inmigrante di paisnan Latino, cu pa un gran parti tin religion catolico.

Te aki e datonan aki, importante pa por comprende loke ta sucediendo na San Nicolas. E pregunta ta awor: kico ta bay haci pa futuro? Nos ta simplemente sigui e rumbo cu e scolnan presente ainda ta sigui, y si tin mas scol cu mester cera porta, ‘que sea asi?’ Nos por bay den otro direccion tambe, y esey ta cu nos ta purba proyecta kico futuro desaroyo ta duna nos. Por ehemplo: ta bay habri un hotel di 600 camber, pa cual nos mercado no tin trahador. Nos no tin idea ainda kico ta e empleo cu e plannan cu e tereno di refineria lo duna. En todo caso, lo trece algun mil persona di exterior. Nan mester lugar di biba y nan yiunan, cu ta bin despues, lo mester bay scol. Kico ta e perspectiva real, pasobra di otro banda nos ta mira cu aña tras aña tin menos mucha ta nace aki, loke riba su mes ta duna e perspectiva di cada vez menos necesidad di scol y maestro…

E problema principal cu nos ta sinti den e actual situacion ta cu nos no ta tende nada di kico realmente ta bay sucede, ni den enseñanza, ni den economia. Di e manera aki ta bira dificil pa por planifica algo realistico, mientras en todo caso e mandatario encarga cu enseñanza ta duna e impresion cu ta tratando di pospone decisionnan importante pa futuro, mientras cu ta tene prensa y publico contento cu decisionnan secundario, sin revela nada di e cambionan grandi cu supuestamente ta planeando cu Hulanda. Asina e lamento politico conveniente di e dianan aki tampoco ta yuda.