Dr. Horacio e Oduber na luna di april a anuncia cu lo start cu un investigacion di transfusion di plasma di pashentnan cu a recupera di Covid-19, pa mira si e lo ta uno efectivo pa recuperacion di pashentnan admiti cu Covid-19.
Segun un comunicado di prensa, hospital su team medico conhuntamente cu Drs. Choudhry a tuma e decision pa stop e investigacion di transfusion di plasma pa pashentnan interna cu Covid-19. Na prome instante e investigacion di plasma como medicina pa yuda un pashent mehora tabata mustra uno prometedor mundialmente, y awo algun luna despues tambe tin resultadonan cu a demostra cu e no ta yuda pa cu e mehoracion di pashent cu Covid-19.
Den e cuadro aki y alabes mirando cu poco pashent di Aruba admiti cu Covid-19 por a bin na remarca pa ser trata cu plasma y sin lubida un parti importante cu ta e limitacion den finanzas na HOH a tuma e decision pa para e investigacion aki.
Sigur nos kier a gradici tur donante di plasma cu a contribui na e investigacion aki y tambe e team di profesional tras di e investigacion aki.
