Arte ta proporciona un medio pa expresa imaginacion den formanan no gramatical. Diferente na palabra, cu ta bin den secuencia di cual cada un tin un significado defini, arte ta ofrece un variedad di forma-, simbolo- y ideanan cu significadonan cu e artista mes por determina. Esey ta local e grupo Lazos de Amor Mariano (LAM) kier implementa den nan lesnan nobo di arte pa mucha y hoben.

Adriana Murcia, presidente di e grupo LAM, a conta Bon Dia Aruba cu e idea pa cuminsa cu e lesnan di arte pa mucha y hoben, Diasabra di Arte pa Mucha, a lanta pa asina purba evangelisa e muchanan pa medio di pintamento, arte y colornan.

Durante e lesnan e muchanan ta siña diferente tecnica di pintamento, manera por ehempel con pa crea fondo y pone figura riba e fondo, con pa haci un poco di collage, con pa combina colornan. “Nan ta siña con pa pinta, wak cua ta e figuranan geometrico, con pa no sali di e margennan, con combina colornan, con pa haci decoracionnan, entre otro, y e ta bay stap pa stap”, el a bisa.

El a conta cu nan a cuminsa for di cero pasobra nan no tabata sa muchanan di ki edad ta bay yega pa e lesnan. Nan a ricibi muchanan di 4 pa 14 aña y ‘nos ta siñando nan e evangelio’ Cristian. E prome les tabata tocante e shete dianan den cual Dios a crea mundo y e muchanan mester presenta, pinta, di cada un di e dianan ey, segun nan imaginacion. Asina, Sra. Murica a bisa nan por haya sa mas o menos riba ki nivel cada mucha ta, kico nan ta crea y si nan tabatin pregunta.

“Hopi di nan a haci nan prome y segundo dibuho solamente, pasobra nan tabata asina concentra y no a logra haci e otro pinturanan y nan no tabata sa con pa avansa. Den e di dos dia ya nan a caba y nos a siña nan usa e krijt pa yena tur e espacionan bashi”, el a agrega.

Sra. Murcia a conta cu un escultor conoci, Maritza Erasmus, tambe a ofrece pa haci escultura cu e muchanan. “Ami ta haya esey magnifico pasobra e intencion ta cu pa na juli y december tin exposicionnan di arte. Na juli nan lo traha arte pa e dia di Virgen del Carmen, pa nan haci un escultura di e virgen y na december e muchanan lo traha un pesebre”, el a indica.

E lesnan di pintamento ta wordo duna pa un juffrouw di pintura, Martha Lopes, kende ta un colaborador di e grupo LAM. Murcia ta conta cu Lopes a atende na un di nan retironan spiritual y a keda namora di e grupo y e tabata kier ofrece su arte pa asina por a evangelisa. “E ta pone e arte y nos ta pone e evangelisacion”.

E lesnan di arte ta tur diasabra di dos pa cuater den e hofi di Mama Maria na Misa Pro Catedral San Francisco, y e ta habri pa tur mucha y hoben cu kier participa, siña di e arte di pintamento y di Maria y Jesus.

Sra. Murcia a enfatisa cu un di e intencionnan principal pa cuminsa cu e lesnan di arte ta pa e muchanan siña algo y tambe pa nan interactua y conoce otro muchanan, kita nan for di television, kita nan for di e aparatonan electronico y mas bien laga nan haci algo cu lo yuda nan usa nan creatividad.

“Mi ta pensa cu nos tur tin algo pa duna, nos tur tin algo pa ofrece y nos tur mester purba wak con nos por logra pa e muchanan, e hobennan tin actividadnan diferente na e television pa haci pasobra definitivamente e ta hopi necesario cu e muchanan por haya otro cos pa haci”, el a finalisa.