E parlamentario y lider di fraccion di MEP, Rocco Tjon a expresa cu e ta contento cu e anuncio cu a wordo haci, caminda na corto plaso lo wordo institui un team di vigilancia di nos costanan cu ta bay consisti di oficialnan di diferente departamento di polis. Ya cu nunca ta posibel pa laga un marinier eherce e tarea di un agente policial of di un persona cu ta traha den kustwacht of den Warda Nos Costa, etc..

El a expresa cu e marinier tin otro tipo di training y nan instruccion ta completamente otro cu esun di un agente policial. Si esaki lo tuma luga nan kier sa cual ta e base legal. Esaki si den un corto plaso e marinier lo wordo prepara pa eherce e tarea aki pa cierto periodo. Pero di otro banda e ta haya cu ‘un decision asina ta un falta di respet pa educacion di nos agente policial’. “Den nos concepto, inaceptabel”, el a bisa.

A base di su experiencia e ta sigura cu tin unidad policial cu mas training y mas miho ekipa cu armanan mas pisa caba. Pues e no ta wak e balor agrega pa aworaki bay percura pa mariniernan tuma e tarea aki over. E ta haya cu Hulanda por tin su opinion, pero na final di dia e realidad a mustra cu ora e trabou di vigilancia mester tuma luga den e area isola patras di nos isla, ta nos agente policial mes di kustwacht y Warda Nos Costa tabata pone nan bida den peliger. “Cu tur respet, pero mi no a wak niun Hulandes ta cana aya tras, y ta pone nan bida na peliger.”

Pero pa realisa e trabou aki, e ta haya prioritario e necesidad di un radar, enbes di bin cu drone, ya cu e drone nan tin un balor limita pa e siguridad di nos fronteranan. P’esey nan fraccion a urgi cu e placa aloca den e presupuesto pa drone por wordo uza mas pronto posibel pa adkiri nos propio radar. Ya caba tin un estudio cu esaki ta posibel cu un suma rasonabel, y actualmente tin suficiente fondo den e fondo pa bin cu un radar pa cuerpo policial bek.

Vigilancia di nos costa

A base di su experiencia y trayectorio di 16 aña den e cuerpo uniforma aki unda el a lidera e team di aresto y unidad di crimen organisa, prome cu el a dicidi di bira politico, a bisa cu radar ta esencial pa e trabou cu polis mester realisa pa vigila nos costanan, y e polis cu ta haci e trabou aki, nan sa di e balor agrega di e radar.

E ta keda para riba e punto cu nos unidad local mester percura pa siguridad di nos frontera, semper cu un bon cooperacion cu marina real, ya cu esaki semper tin un balor agrega. Pero pa eherce e trabou specifico aki pa supervisa nos costa, esun cu tin e trabou, mester keda cerca nos unidad uniforma local, ya cu esaki ta keda un tarea policial. Pero den e cadena di husticia, e mester bira un joint-venture cu tur e otro partnernan, entre nan duana, Warda Nos Costa, kustwacht, inmigracion, etc..

Pero pa eleva e siguridad aki nan mester haci uzo di un radar, ya cu e siguridad di nos oficialnan mester keda na prome luga.

Tambe el a tende cu den pasado a wordo bisa cu tabatin iregularidad cu e maneho di radar den man di un instancia riba tereno di husticia. Pero si esaki tabata berdad mester e denuncia esaki, ya cu ta inaceptabel cu e tipo di historia aki ta bin dilanti y no ta wordo actua riba nan. Pa e parlamentario aki, e uzo di un radar asina pa pais Aruba y tambe pa nos autoridadnan tin un balor agrega. E ta bisa pa experiencia propio cu hopi boto cu cosnan ilegal a wordo intercepta.

Team marino di polis

Tambe e ta lamenta cu durante e ultimo añanan no a wordo inverti den e team maritimo di polis. Esaki tin nan preocupacion pa motibo cu na prome instante polis maritimo ta e unidad, entre otro pa garantisa e siguridad den nan fronteranan. Tur e material cu nan a yega di haya a bin for di Aruba Hotels & Security Foundation (AH&SF), entre nan un boto cu tempo cu e tabata miembro di e cuerpo policial, a pidi pa e wordo ekipa cu un radar tambe cu pais Aruba si mester a paga pe.

E ta haya cu esaki ta un unidad masha importante cu nan material a bira limita y mester di mas inversion pa amplia aspecto di siguridad den nos lama den colaboracion cu kustwacht. El a entrega na prensa un copia di un carta pa demostra cu te cu 2011, Aruba tabatin su radar den forma operacional y dicon a permiti pa kita e radar di pais Aruba. “A base di experiencia propio, mi sa cu ainda na comienso di 2011, Aruba ainda tabatin su mesun radarnan.”

P’esey e ta considera inaceptabel cu den pasado por a bay cu tipo di historia asina pa destrui e tipo di radar aki. Tambe e ta haya ilogico cu si tabatin desconfiansa riba e gobierno di MEP cu a bin cu e radar, cu durante e ultimo añanan tabata den man di cuerpo policial, dicon no a sigui cun’e ora cu e gobierno aki a cambia pa esun di partido AVP. Te hasta si Hulanda tabatin un sospecho, nan por a actua riba dje.