E decision anuncia di por lo pronto no habri frontera aereo cu Venezuela realmente no ta un sorpresa. Tabata un sorpresa cu algun tempo pasa a tuma e decision pa habri e conexion maritimo entre e islanan y costa Venezolano, pasobra realmente nos no tabata mira cambio sustancial positivo den e situacion na e pais ey pa hustifica esey.

No ta nada straño tampoco cu Hulanda, den e colaboracion cu e islanan, a dicidi di reforza presencia di Koninklijke Marechaussee. Segun e cifranan cu nos por a observa, awor tin alrededor di 100 miembro di Marechaussee na e varios islanan. Esaki lo no a sucede si lo tabatin un situacion mas tranquil den region. Y un gran parti di e falta di tranquilidad tin di haci directamente cu e situacion na Venezuela, unda e tipo di regimen autoritario cu ta goberna pa casi 25 aña caba, ta ser considera e menaza principal pa seguridad den nos region.

Loke a bin complica e situacion ainda mas, ta e surgimento di un gobierno di mesun ideologia na Colombia cu esun Venezolano, pero cu no necesariamente tin e poder riba henter gobernacion manera esaki a bira na Venezuela, durante mas di dos decada di poder sin limite den tur sentido, loke a conduci na un regimen totalitario di e peor tipo, cu ademas a trece un problema extra: mientras normalmente narcotrafico ta sucede na man di persona y organisacionnan priva, cu gobernacion den un papel di combati e trafico aki, na Venezuela tin desde hopi aña lazonan estrecho entre narcotrafico y gobernacion, tanto na nivel politico como den e cuerponan uniforma. Cu e colaboracion estrecho cu ta existi tambe cu e organisacionnan guerrillero Colombiano, cu banda di ideologia izquierdista tambe tin decadas ta opera den narcotrafico, esaki a crea e situacion cu e fluhonan principal di narcotrafico via lama Caribe tin nan punto di salida na Venezuela.

Por lo tanto, den algun Editorial anterior, ya nos a trece e critica dilanti cu habri frontera cu Venezuela no tin ningun sentido, tampoco pa e trafico maritimo, mientras ta reina e situacion ya describi di e transporte di droga (y hende) via lama. Un argumento cu a trece dilanti tabata e acceso na fruta y berdura barata di e pais ey, loke tampoco ta parce nos un argumento di peso. Riba e totalidad cu nos ta importa, loke por bin di e pais ey no ta un cantidad sustancial, pues realmente relevante pa nos. Ademas, nos lo mester puntra nos mes ta ken ta esunnan aya cu tin acceso na producto pa exporta. Nos ta beneficiando ken na Venezuela? En todo caso no e parti pro-democracia y anti-chavista, cu pa gran parti no tin acceso na e bida economico reduci. Tambe nos no tin ningun indicacion cu e corupcion enorme cu tin den y alrededor di e puertonan di e pais, na man di militar y personal aduanero, lo a mengua pasobra gobierno Chavista ta haciendo algo al respecto. Awor, pakico esnan cu acceso na poder gubernamental ta en busca di relacion comercial cu e islanan? Pasobra den e situacion economico dificil na e pais ey tur hende ta en busca di divisa, especialmente dollar Mericano. Ya un gran parti di economia, tambe comercio den interior, ta tumando lugar den dollar cash. Loke nos ta haciendo habriendo frontera cu Venezuela, den cualkier sentido ta beneficia e regimen, pasobra e ta aumenta nan acceso na divisa for di exterior. Ta sumamente simplista cu aki gobierno ta papia solamente di e beneficionan comercial – minimo – cu e comercio cu Venezuela tin pa nos, pero nunca ta dedica un silaba na e situacion na e pais bisiña.

Di otro banda, nan no mester di bisa algo tampoco, pasobra al final de cuentas gobierno di Aruba, o di e otro islanan, no tin tanto di bisa den e decision final, cu ta den man di gobierno Hulandes. Esey pa bon motibo pasobra esun cu tin frontera cu republica di Venezuela no ta Aruba, sino Reino Hulandes. Gobierno Hulandes tin un embahada na Caracas y tin nan propio fuentenan di informacion, a base di cual nan ta tuma decision, tambe scuchando opinion di e teritorionan cu ta na e frontera. Bon mira, e teritorio maritimo cu Reino Hulandes tin den Caribe ta enorme, si ta inclui e zona economico exclusivo di 200 miya. Controla tur esaki ta un tarea considerable, cu bien por usa un poco tranquilidad envez di e complicacion cu Venezuela ta ofrece su bisiñanan na e momento aki.

Ademas di tur esey nos mester ta consciente tambe cu nos seguridad no ta solamente na nos costa. Nos tin un situacion internacional delicado, unda nos ta un di e teritorionan perteneciente na NATO, cu tin frontera cu otro teritorio cu ta fiel aliado di Rusia, actualmente e problema mayor pa e pacto di paisnan Europeo y Merca. Esaki tin como consecuencia cu aki lo mester tin un bon control riba e personanan cu ta drenta y sali. Esaki ta trabao sumamente confidencial y nos tin tur comprension cu gobierno no ta comenta tocante e desaroyonan aki. Ta pesey tambe cu nos no tabatin comprension recientemente pa a habri e conexion maritimo. Esey ta trece mas riesgo innecesario ainda. Logico cu nos niun ta spera un deterioro di e situacion internacional, y sigur no cu consecuencia pa nos. Pero no ta pa esey nos mester ta prepara y planifica, sino pa lo contrario. Laga e frontera ey cera; ademas, ta nan a cer’e na 2019…