Randall Croes kende ta miembro di e directiva di Camara di Comercio y Industria di Aruba (KvK )y presidente di e comision di E-commerce a realisa hunto cu un delegacion di e directiva di KvK un bishita diahuebs ultimo na Banco Central Aruba,  pa sigui explora e posibilidad di desaroya e idea aki pa wak cu utilidad KvK  pa promove di e-commerce na Aruba.

“Laga e-commerce  cuminsa existi na Aruba, ya cu e tendencia di futuro ta pa cumpra mas via internet”, sr. Croes ta bisa.

Tin varios iniciativa for di 2001 riba e tipo di negoshi aki y KvK ta pidi e sector politico pa saca e iniciativanan aki for di lachi y bin cu nan como prioridad halto. E ta spera cu prome cu eleccion lo por tin interes pa pusha e tipo di iniciativa aki den Parlamento. Pero si no ta logra KvK ta spera cu tur partido politico lo ta bon consciente di e importancia di un proyecto di ley asina y impulse den nan programa.

E-commerce na Aruba
e-commerce ta e posibilidad cu bo tin como  consumido di cumpra algo via internet cu  bo credit card.  E idea di KvK ta pa akinan mes na Aruba y sin paga na dollar cu bo credit card na florin di Aruba, bo lo por cumpra algo on line for di un tienda local via bo computer of tambe via bo smart phone; y entrega na bo domicilio . Segun sr. Croes e bentaha ta cu e comerciante por pone su warehouse unda cu nan kier rond di Aruba, pagando un huur mas barata y treciendo nan mercancianan di afo. E comerciantenan local  por participa den actividad comercio sin tene gastonan grandi y asina competi cu e website cu tin den exterior manera Amazone.

Stroba pa motibo di pago online
E ta haya cu e posibilidad aki ta un poco stroba na Aruba, ya cu di un banda no tin credit card na florin y di otro banda bo no por uza bo debit card pa paga online. P’esey ta necesario cu e ATM mashin di e tienda por ta disponibel via on line tambe. KvK a haci un apelacion pa e sector bancario pa bin cu un sistema cu lo por facilita e benta aki via online. Segun sr. Croes e negoshi aki tin posibilidad di existencia riba nos isla y e por competi cu e website di exterior, a pesar cu mayoria di nos productonan ta bin di afo. El a trece como ehempel cu un tienda cu ta bende sapato of paña mester por uza nan ware house patras di nan negoshi y via di nan website bende e mesun productonan cu tin den stock cu un hende encarga pa deliver  na un bon prijs. Pa e negoshi aki por bira exitoso, e ta papia di volumen di importacion di e mesun producto, pa asina haya un prijs mas barata of preferencial y asina competi cu e websitenan di afo. E intencion ta pa no laga cu e website di afo ta come henter  e bolo di e negoshi aki conoci como e-commerce, perhudicando nos empresarionan local ya cu  e sistema aki no t’ey.

Sr. Croes ta bisa cu e ta consciente cu un sistema asina lo  por trece competencia internamente; pero e ta prefera cu: “Arubiano competi cu Arubiano, enbes di Chines, Mericano, tur pais di exterior ta competiendo cu nos y tur e dollarnan ta bay afo y no tin business na Aruba.”

Tambe a nivel di legislacion mester traha ley pa facilita e negoshi di e-commerce y brinda proteccion tanto na e consumidor como esun cu ta bende, y bin cu regulacion.