Ruthy Vrieswijk-Bergen miho conoci como e poeta ‘Lady Ruth’ ta bay cumpli 44 aña den farandula. E tin un show na caminda anto a acerca e Fundacion pa Hende Muhe den Dificultad pa regala nan e fondo di carchinan bendi.
“Mi ta gusta duna bek na comunidad, mi ta un lider scout di curason, semper cla pa yuda. Den esey mi ta contento cu mi ta hayando hopi yudansa,” Lady Ruth ta bisa. Lady Ruth a cuminsa u 16 aña como maestra di ceremonia den e tempo ey yama e Wilhemina Stadion. Anto asina el a drenta cuminsa canta, skirbi, actua y gusta e mundo artistico. Bencho di La Moderna a ofrece Lady Ruth casi tur cos cu e mester pa e show den vestuario; bunita bisti, un bunita par di sapato y acesorionan cu ta bay acerca pa como hende muhe e luci bon e dia ey. Lady Ruth lo recita y poemanan y canta na papiamento, Hulandes, Ingles y Spaño.
Pakico kies FHMD
Lady Ruth tabata tin dos opcion cual semper ta scouting y fundacion pa hende muhe ora trata di yuda cu fondo. “Pasobra cu benta di buki cu CD mi a yega di duna scouting caba anto nan mes a yuda bende. 8 di maart, dia internacional di hende muhe, tabata net tras di lomba anto ma kies hende muhe pa pone nos hende muhenan den tiki luz atrobe.”
Departamento di Cultura
Stanley Dabian, relacionista publico na Departamento di Cultura Aruba: “Nos ta aplaudi iniciativanan asina di e One Woman Show. Pasobra e tin ingredientenan artistico den dje den e acto aki nos ta bay mira varios faceta di dje; canto, poesia, musica y baile.” Tambe mas cu claro esaki ta un proyecto cu no tin fin comercial. Departamento di Cultura a duna Lady Ruth tur e apoyo cu tin manera cu el acerca nan.
“Nos ta promove loke ta cultural. Y mas cu claro nos tin un responsabilidad pa educacion cultural na Aruba pues esaki ta un tremendo programa pa nos para su tras.”
E asina yama ‘one woman show’ di Lady Ruth lo tuma luga na Cas di Cultura dia 24 di mei for di 8’or di anochi. Lo tin musica en bibo di Jerry Diaz, Mario Kelly, Albert Croes y Tino Ruiz.
