(Infobae) – Lady Gaga a revela cu e tabata na estado despues di un violacion tempo cu e tabatin 19 aña, pa un productor ken su nomber e no kier revela.

Durante un entrevista pa e documental di Oprah Winfrey titula “The Me You Can’t See”, e cantante a conta cu a dura hopi tempo pa e por yega na un punto stabiel cu su salud mental.

El a revela cu tempo cu e tabatin 19 aña el a ser viola pa un productor musical, ken su nomber e no kier revela pa motibo cu e no kier tin nada di haci cu e persona aki mas. “Mi tabatin 19 aña, y tabata trahando riba mi cantica, ora cu e productor aki a bisa mi ‘kita bo paña’, mi a bisa ‘no’, y na e momento ey e productor a menasa cu kima tur mi canticanan si mi no haci loke e ta bisa mi, y no a stop di bisa mi pa kita mi paña, mi a keda den shock, y no ta corda hopi mas despues di esey” e cantante a conta.

“Mi ta compronde cu tin e movemento #METOO y cu hopi hende ta sinti nan mes comodo den dje, pero personalmente ami no kier bolbe enfrenta e persona aki, y pa e motibo aki, nunca lo mi revela su nomber.”

Despues di añanan largo, ora cu Gaga a corda e trauma, y sintiendo mescos cu ora el a ser abusa, el a yega na un psikiatra cu a atende y yud’e supera su trauma.

“Añanan despues mi a bay hospital, nan a trece un psikiatra y mi a bisa nan ‘trece un dokter di berdad’, ‘dicon tin un psikiatra akinan’, ‘mi no por sinti mi curpa’” Gaga ta agrega, “Mi a sinti un dolor profundo den mi curpa, y mi a pega soño.”

Lady Gaga ta conta cu solamente despues di un tempo largo sintiendo su mes malo, el a realisa cu e sintomanan cu e tabatin, ta mescos cu ora e violacion a tuma luga. “E tabata e mesun dolor cu mi a sinti despues cu e violacion a laga mi na estado, y mi tabata na e skina di mi mayornan su cas, sacando pa motibo cu un persona a abusa di mi. Despues di e momento aki, mi a keda cera den un studio di grabacion pa lunanan largo.”

Esaki no ta e prome biaha cu su curpa a actua di e manera aki. Frecuentemente Gaga su curpa ta comporta di e manera aki; Diripiente e no por sinti su curpa, y no tabatin ningun motibo fisico cu por a splica esaki.

“Mi a sufri un shock psicotico hopi fuerte, durante hopi aña mi no tabata e mesun persona. E manera cu mi curpa tabata sinti diripiente, ta e mesun manera cu mi curpa a sinti ora cu nan tabata abusando di mi. Dokternan a haci hopi test, MRI, y nunca nan no por a saca afo cua tabata e problema. Pa motibo di esaki, mi a aleha hopi, e ta manera cu mi celebro ta desconecta, y bo no ta compronde ni procesa dicon tur otro hende ta den panico, of actuando di e manera cu nan ta. E ta manera cu bo tin un nubia preto riba bo cabes, y bo ta sinti e nubia aki cu bo unda cu bo bay.

Lady Gaga ta splica, cu tempo y pasenshi, poco poco e ta sacando su mes for di e estado mental aki, y asina por mehora, y yega na ta su mes atrobe.