Un compania di biotecnologia Mericano a bisa cu a crea un vacuna pa coronavirus tres ora despues cu a haya acceso na e secuencia genetico di e virus dia 9 di januari ultimo, y awo cientificonan ta purando pa pone e vacuna den mercado den tempo record.
Inovio Pharmaceuticals ta basa na Pennsylvania, pero cientificonan den su laboratorio na San Diego a haci e descubrimento.
“Nos tin un aligoritmo cu nos a diseña, y nos a pone e secuencia di DNA den nos aligoritmo y a inventa e vacuna den un tempo cortico”, director di investigacion y desaroyo di Inovio, Dr. Trevor Smith a bisa KVUE.
China a reporta 254 morto nobo cada dia, y un aumento den caso nobo diario na 15, 152, despues cu a aplica metodologia nobo den e provincia di Hubei riba e forma con ta categorisa e casonan.
E vacuna di Inovio pa COVID-19, manera oficialnan di Salud a yama e virus, por ta cla pa berano. Stock di Inovio a aumenta na $5.32 pa accion algun dia despues cu e compania a anuncia cu a ser selecta pa traha riba un vacuna pa coronavirus. Accionnan awo ta na $3.34, bek na unda tabata un luna pasa.
E compania Mericano ta asociando cu Beijing Advaccine, un compania Chines, pa traha riba e vacuna.
“Participacion di Inovio den e esfuerso di desaroyo aki ta basa riba e propiedad ideal di su plataforma di DNA medico pa rapidamente desaroya vacuna contra virus cu ta emerge cu potencial pandemico, su capacidad proba di desaroyo di vacuna, y un record fuerte di genera rapidamente medidanan contra menasanan di pandemia anterior”, e compania a bisa den un declaracion dia 30 di januari ultimo. “Inovio tabata e prome pa avansa su vacuna (INO-4700) contra MERS-CoV, un coronavirus relaciona, na evaluacion den humano.”
Otro compania Mericano, Novavax basa na Maryland, tin como meta pa crea un vacuna di coronavirus den apenas tres luna, maske vacuna asina por dura añanan pa desaroya. E compania a traha un vacuna pa Ebola den 90 dia.
