“La Casa del Venezolano, un proyecto dedica pa yuda un y tur”

Fundacion Venearuba Solidaria cu apoyo di Pan American Development Foundation (PADF) di Merca a crea e proyecto “La Casa del Venezolano” pa duna asistencia social, huridico y educativo na personanan di tur nacionalidad cu ta den necesidad y cu tambe kier haya capacitacion den diferente area.

Den un entrevista cu Bon Dia Aruba a haci cu Luis Zarraga, cu ta fungi como presidente y Grislynn Hernandez como coordinador general, nan a splica cu for di algun aña pasa ora frontera cu Venezuela a cera, un grupo chikito di persona cu tabata den e lucha pa manda ayudo na diferente instancianan di Venezuela a cuminsa pensa riba e idea con nan por haci pa por yuda di un miho manera e personanan cu menos recurso den comunidad.

For di eynan Venearuba Solidaria a nace, un NGO unda nan ta duna un man na personanan tanto di Aruba como di Venezuela y otro paisnan organisando diferente actividad y na unda nan no por a imagina cu den un periodo cortico nan por a haya un proyecto di magnitud grandi y di importancia cu e fin di apoya, contribui y coopera cu e poblacion cu di un forma of otro mester di yudansa.

Cu e preparacion di tur di nan a ser crea e proyecto “La Casa del Venezolano” cu na november di 2021 a logra habri su portanan danki na PADF di Merca cu conhuntamente cu fundacionnan tanto local como Cruz Cora, FCVR, Telefon pa Hubentud por ehemplo y internacional como ACNUR, HIAS y OIM nan ta ofrece espacionan pa e proteccion di personanan vulnerabel di e comunidad.

Hernandez a señala cu personanan cu tin mester di ayudo por acerca te nan oficina pa asina hunto cu otro organisacionnan y fundacionnan uni como plataforma cooperando cu servicionan y ayudo psico-social primario cu trahado social y abogado nan ta ofrece ayudo huridico den casonan no compleho y tambe nan ta brinda na e muchanan e derecho pa educacion cu ta yama “Siña Merdia” cu ta sirbi manera un traimerdia pa studiantenan di scol basico for di dialuna te diahuebs y diabierna ta dedica na hobennan di scol secundario.

For di 2or di merdia te cu 5or di atardi, un cantidad di aproximadamente 60 mucha ta asisti na Siña Merdia y tambe nan ta haya ayudo cu idiomanan pa asina por integra den comunidad cu docente y linguistanan, den oranan di mainta nan ta duna cursonan di idiomanan na adulto di 18 aña bay ariba pa di e forma ey nan por siña e idioma local tambe cu ta papiamento, tur nan servicio ta wordo ofreci di manera gratuito.

Tayernan como di resiliencia, leynan laboral, proteccion infantil, derechonan di muchanan, como otronan di capacitacion ta wordo ofreci, di esaki Hernandez a señala cu “akinan tur esnan cu ta bin busca un ayudo, nos ta purba di tur manera pa nos yud’e haciendo siguimento di nan caso, dunando un contesta positivo of afirmativo cu instancianan cu ta coopera, dunando atencion na personanan cu tin mester di dje, e parti mas importante ta pa nan sinti como den nan cas, cu no necesariamente bo mester ta Venezolano, nos ta yuda tur nacionalidad”, el a sigura.

Ademas, el a declara cu entre e muchanan cu ta asisti na Siña Merdia nan tambe ta atende muchanan naci na Aruba, como di otro nacionalidad como dominicano, Peruano, Chines, etc.

Entre e casonan cu nan ta haya mas preocupante di personanan cu a yega cerca nan pa busca ayudo, Hernandez a bisa cu tin casonan di personanan cu ta wordo saca di casnan y tambe di migrantenan sin documento cu no tin seguro di AZV y cu ta sufri di malesa di cancer, “e casonan aki ta alarmante, pasobra tin personanan cu ta busca di mil manera di sali for di Aruba pasobra akinan no por haya ayudo, nan ta bira pio pa via cu nan no por traha, loke a causa cu nan ta tuma e decision extremo di bay back Venezuela cu boto”, Hernandez a comenta.

“E proyecto aki ta un reto, mi ta kere cu esaki ta un reto cu tur fundacionnan cu ta yuda ta presenta e reto y fundacionnan cu ta enfoca riba ayudo humanitario mester enfoca mas den trabou aki, mi no ta wak cu nan ta enfoca riba esaki na unda tin hopi hende cu cancer na Aruba” Hernandez a bisa.

Tambe el a trece dilanti cu e aña aki lo ta uno dificil pa loke tin di haber cu muchanan, pa motibo cu entre tur organisacionnan e aña pasa nan a logra paga schoolgeld y seguro pa mas di 700 mucha, e aña aki entre tur organisacionnan nan a haya un capacidad pa 250 mucha so, esey sin conta si schoolgeld lo aumenta manera a ser informa dianan pasa.

Asina mes, nan ta paga scol pa otro muchanan migrante cu ta busca nan integracion den comunidad y nan tin convenio cu diferente scolnan como por ehemplo PRISMA.

Ta importante pa destaca cu “La Casa del Venezolano” no ta ricibi ayudo gubernamental sino cu nan fondonan ta bin directamente for di Organisacion di Estadonan Americano (OEA) a traves di PADF unda nan ta coopera cu e implementacion di e proyecto aki cu ademas di existi na Aruba, tambe ta existi na Corsou cu colaboracion di Human Rights Defense y Salud pa Tur un hospital gratis pa migrantenan.

Pa finalisa, tin personanan cu pa via di e nomber di e proyecto “La Casa del Venezolano” ta kere cu esaki ta dirigi pa duna ayudo solamente na migrantenan di Venezuela unda cu esey no ta berdad, Hernandez a destaca cu esaki ta un programa di asistencia social, asistencia huridico y di educacion pa tur persona di tur nacionalidad cu tin mester di dje.

Pa personanan interesa di haya mas informacion por acerca na oficina di “La Casa del Venezolano” na Dominicanessenstraat #24 for di dialuna te diabierna for di 8.30 di mainta te 6or di atardi, tambe via Whatsaap na e telefon 730.8952.