Kyra Hoevertsz ta un atleta destaca den disciplina di water ballet, cu a conkista cantidad di medaya representando Aruba cu gran orguyo y disciplina. Pa Dia di Hende Muhe, Bon Dia Aruba a combersa cu Hoevertsz pa haya sa un tiki mas di su bida y enfoke.

Actualmente, Hoevertsz tin 25 aña di edad. E ta conta cu na Aruba, el a atende Scol Basico Washington y a haci dos aña na Colegio Arubano. Despues di esaki el a muda pa Merca unda el a completa high school. Despues, el a gradua di Lindenwood University cu un Bachelor den Marketing, y actualmente, e ta den proceso di aplicacion pa universidadnan, pa asina continua su estudio cu meta pa haal su Masters.

Su hobbies na e momentonan aki ta pasa tempo cu famia y amigo, bay beach y chill. E tambe ta disfruta di biaha y mira kico tur mundo tin pa ofrece.

“Na Aruba mi infancia tabata hopi leuk”, Hoevertsz ta conta. “Mi semper tabata core bicicleta cu mi amiganan y tabata pasa hopi tempo cu mi welonan. Door cu mi a muda cu apenas 14 aña, mi infancia tawata un tiki mas cortico cu otro hende, pero esey ta pasobra ami mes a dicidi di enfoca completamente riba mi deporte.”

Hoevertsz ta conta cu el a cuminsa cu water ballet cu apenas 7 aña di edad, pero el a cuminsa bira hopi competitivo ora e tabatin 12 aña, eynan ta ora el a ripara cu e deporte tabata algo cu e tabata kier a continua na nivel profesional. “Cu 14 aña mi a logra convence mi mayornan pa laga mi bay biba na Merca pa por enfoca completamente riba e deporte.”

Mirando e exito excepcional cu Hoevertsz a alcansa, Bon Dia Aruba a puntra con importante e aspectonan di dedicacion, sacrificio y disciplina tabata pa yega na tur su logronan den mundo di deporte. “Mi ta kere e tresnan ey ta esnan di mas importante den e mundo di deporte. Sin nan bo no lo logra mucho, of nada na un nivel elite.”

Ademas, pa ta un atleta profesional na nivel elite ta rekeri hopi sacrificio, y esaki ta algo cu Hoevertsz ta consciente di dje. “Ami a sacrifica un bida normal desde 14 aña, pasobra mi a dicidi di laga tur mi amigo y famia na Aruba pa bay biba mi so na Merca,” e ta reflexiona. “Mi a mantene amistadnan si, pero nunca mi a bay fiestanan di cumpleaños, nunca mi a bay niun evento (por ehempel concierto) na Aruba, nunca mi tabata logra bay get-togethers cu amigonan pasobra ami si tin bedtijd, y e lista ta sigui. Mi no ta bisando cu ami nunca a haci cosnan leuk den bida, pero djis mi tabata hopi cauteloso cu kico mi ta haci. Awo cu mita mas grandi, mi conoce mi curpa miho caba, y mi mes ta dicidi ki ora mi por haci algun actividad pa por relax. Ora mi tin off di training si mita purba di topa cu amigonan mas hopi cu por, pasobra mi sa cu ora mi drenta training back, cos ta bira mas complica atrobe.”

Recientemente, Hoevertsz a keda nombra entre e 7 miho na mundo den solo y di 14 pa DUO, y esaki ta apenas algun di su logronan. El a logra un total di dies medaya den e Weganan Centroamericano y del Caribe, a gana e evento di solo dos biaha den Campeonato Panamericano, y tambe a gana varios titulo di campeonatonan nacional na Merca. El a competi den un total di 6 Mundial, di cual den e ultimo dos, el a logra su miho resultado!

Hoevertsz ta un muhe ehemplar, un muestra bibo cu trabao duro y disciplina ta hermentnan importante pa logronan den bida. Asina e por ta un inspiracion pa hobennan cu tin aspiracion y soñonan grandi. Pa nan, Hoevertsz tin un mensahe:

“Keda positivo y tuma stapnan chikito tur dia. Tin biaha e hendenan mas cerca di bo ta esunnan mas negativo, no tuma esey personal. Tene bo meta den bo mente y acepta cu tur loke bo haci (fuera di training tambe) ta sea yuda bo of stroba bo yega. Y super importante, sea lief cu bo mes. Abo ta bo enemigo mas grandi, tene pasenshi cu bo mes y celebra bo logronan chikito. Un logro chikito pa dia ta mas importante cu un logro grandi pa luna.”