Revista Forbes, cu anteriormente a declara Kylie Jenner un biyonario riba su portada, ta bisa cu e no merece e titulo mas, pero Jenner no ta di acuerdo.
Forbes a bisa den un storia publica diabierna ultimo cu un examinacion di documentonan financiero despues cu e strea di reality y mogul di beyesa a bende un accion mayoritario den su compania di cosmetica a revela cu e balor di Jenner tabata infla. Jenner a bende 51% di su compania Kylie Cosmetics na Coty den un acuerdo balora na $1.2 biyon e aña aki.
“Negoshi di Kylie ta significantemente mas chikito, menos rendabel, cu e famia a pasa añanan poniendo industria di cosmetica, y medionan di comunicacion incluyendo Forbes, pa kere”, e revista a bisa den e storia. “Forbes awo ta pensa cu Kylie Jenner, hasta despues di ricibi alrededor di $340 miyon despues di impuesto for di e benta, no ta un biyonario.”
Jenner a responde den un serie di tweets, bisando ‘mi a kere esaki tabata un website di bon reputacion… tur loke mi ta mira ta un serie di declaracion falso y asuncionnan no proba’, agregando cu e ‘nunca a pidi ningun titulo ni purba di gaña NUNCA’.
Negoshi di Jenner y su prominencia riba rednan social a lag’e destaca hasta den un famia extremadamente famoso tras di ‘Keeping Up with the Kardashians’.
Na maart 2019, Forbes a pone Jenner den su revista cu e titulo: ‘Cu 21 aña, Kylie Jenner ta bira e biyonario ‘self-made’ di mas hoben den historia’.
Diabierna, Forbes a ofrece un titulo completamente diferente: ‘Dentro di e red di mentira di Kylie Jenner – y pakico e no ta un biyonario mas’.
E storia ta reconoce cu e crisis di coronavirus y su efecto riba industria di cosmetico a afecta negativamente su balor neto. Pero ta bisa cu ta ‘probabel’ cu e ‘negoshi nunca tabata dje grandi pa cuminsa, y e Jenners a gaña desde 2016 – incluyendo pone nan contador entrega informacion di belasting cu cifranan falso – pa yuda aumenta calculacion di entrada y balor neto di Kylie’.
E revista a bisa cu no tin prueba cu e documentonan ta falso. Abogado di Jenner ta bisa cu e storia ta ‘yen di mentira’. Michael Kump a bisa den un email cu ta exigiendo pa retracta e decclaracionnan falso.
Vocero di Forbes, Matthew Hutchison a bisa den un declaracion cu e ‘investigacion extensamente reporta’ di e revista a ser ‘impulsa pa documentonan recien entrega cu ta revela discrepancianan obvio entre informacion entrega di forma priva na periodista y e informacion entrega publicamente na accionistanan. Nos reporteronan a mira e discrepancianan y a pasa varios luna descubriendo e hechonan. Nos ta curasha su abogado pa lesa e artikel un biaha mas.
E pelea entre Jenner y Forbes a yega te na Wall Street, unda accionnan di Coty Inc. basa na New York a cay mas di 13% diabierna.
