Pa eleccion proximo dia 25 di juni, Camara di Comercio (KvK) cu Universida di Aruba (UA) ta organisa dos debate electoral. Durante un conferencia di prensa ayera, presidente di KvK, Omar Tromp a informa cu tur partido cu ta registra pa participa den eleccion proximo, tambe lo participa den e debate.
E debatenan di KvK ta programa pa tuma luga dia 3 y dia 17 di juni proximo, cuminsando pa 7:30pm. Presidente di e Comite Organisatorio, Wanda Broekseman a informa cu durante e debate, lidernan di tur e partidonan politico participando lo debati riba varios topico cu ta temanan central pa eleccion 2021 y proximo gobernacion di Aruba. Segun Broeksema, e meta di esaki ta pa pueblo di Aruba haya oportunidad pa scucha e politiconan y nan ponencia, di forma obhetivo y neutral, pa asina cada lider politico tin oportunidad di expresa su opinion.
Camara di Comercio y Industria (KvK) kier a enfatisa cu tur e preguntanan cu lo wordo haci durante e debate electoral dia 3 y 17 di juni proximo lo wordo revisa door di un panel independiente y esaki lo keda secreto te na momento di e evento mes.
