Ayera Camara di Comercio di Aruba (KvK) a duna un conferencia di prensa pa informa comunidad tocante “Townhall Meeting” cu lo tuma luga diahuebs awor 2 di juni den cual nan lo trece dilanti diferente puntonan importante como ‘Reforma fiscal’.

Monica Kock ken ta fungi como presidente a trece dilanti cu manera ta conoci, Gobierno di Aruba ta bezig cu un reforma fiscal cu ta encera un impuesto denomina ‘BTW’ y otro cambionan mas, unda nan a trece nan puntonan dilanti varios biaha na gobierno pa cierto cosnan cu por tin efecto riba e economia di Aruba “e cual ta e fundeshi di tur cos cu ta draai pa nos por tin trabao y di otro banda, pa gobierno tin su entradanan” el a señala.

E Townhall Meeting lo cuminsa for di 6:30pm te cu 8:30pm na auditorio di KvK mes e cual ta encera cu nan kier pa tur hende den comercio cu kier ta presente mester registra y presenta nan preocupacionnan dilanti.

Como KvK nan a haci esaki caba con ROP den cual nan a haya hopi informacion di comercio di kico e problemanan por ta como consecuencia di e reforma fiscal.

Kock a menciona cu e puntonan cu lo ta den discusion a wordo publica riba nan website www.arubachamber.com pero tambe nan a cuminsa pone diferente informacion pa tur hende interesa den comercio por mira tur e cambionan cu ta bay tin pa consecuencia di e reforma fiscal aki.

“E ta varia, e no ta definitivo, pero e motibo ta cu nos tin cu pone conhunto e consecuencianan pa gobierno ta na haltura, prome cu gobierno pasa e ley aki”, Kock a sigura.

Ademas, el a enfatisa cu nan tin miedo y tin biaha cu e ley ta bin na ultimo momento y nan ta wordo confronta cu un sistema completamente nobo, un di e puntonan cu el a elabora ta tocante e opinion cu ya caba nan a trece dilanti pa gobierno di e efectonan cu lo tin pa comercio y pa esunnan cu no a pone hopi atencion riba esaki, KvK cu tin tur e companianan registra nan sa cu gran parti di e companianan ta loke nan ta yama ‘small and medium’ companianan cu ta di un pa dos persona, negoshinan chikito cu pa hopi biaha nan no por carga un cambio.

E sistema nobo cu tin cu ta yama ‘BTW’ ta bay duna hopi trabao administrativo compara cu esun di BBO manera Kock a manifesta, e idea di gobierno ta awor ta pa bin cu dos tarifa cu awor ta na 6% pa cuminda y 14% pa tur e otro productonan, loke ta nifica cu comerciante ta wordo exigi cu mester dicidi kico ta cay bao 6% y kico ta cay bao 14%.

Ta p’esey cu nan keho cardinal ta cu no por ta asina cu e ley por pasa den december por ehemplo y 1 di januari di 2023 tur hende tin cu traha cune y ainda no ta defini kico tur esaki ta bay encera, KvK ta di opinion cu mester di por lo menos di seis pa nuebe luna pa comercio por traha y prepara pa esaki.

Un punto cu KvK a haya di comercio caba ta cu “QuickBooks” cu ta e programa administrativo cu mas hende ta usa lo tin dificultad pa pone dos tarifa di porcentahe di impuesto, loke por trece mas gastonan adicional.

“Un otro preocupacion cu nan tambe tin ta e consecuencia pa e inflacion di Aruba “pasobra esey ta esun cu nos ta bay sintie” Kock a señala.

Nan calculacionnan na e momento ey tabata di 10.5% unda cu gobierno tabatin e ‘Theoretis interes’ di 2.5% cu despues a bay na 8.9% di inflacion caba, papiando di sistema di impuesto so “no por imagina e otro inflacion cu ta bin acerca automaticamente, si pa fin di aña nos inflacion, pasobra nos ta importa tur cos na Aruba, e chens ta grandi cu nos ta bay yega na un 8% sin cu e BTW a cuminsa”, el a bisa.

Asina mes, Kock a declara cu si tur cos lo bira caro e pueblo mes no ta bay tin e placa pa cumpra e mesun productonan y e consecuencia di esey ta cu comercio ta bay bende menos y entrada di BTW por baha door di esey, “tur cos ta conecta cu otro y nos ta hopi preocupa pa e consecuencianan sin a pensa of calcula mas leu e consecuencianan”.

Segun Kock, Banco Central a haci un publicacion unda nan a indica cu gobierno tabatin mas entrada cu nan tabata espera y pa esaki el a enfatisa cu “si bo entrada ta bayendo ariba a mi lo bisa, ban wak banda di november of december si bo ta bisa cu mi tin cu bay na e cifranan cu mi ta papia di dje, ta miho cuminsa cu un cifra hopi mas abao pa nos tur por traha riba dje”, el a declara.

E dia di 2 di juni na e Townhall Meeting lo presenta e calculacionnan cu tin cu por tin e consecuencia cu lo tin hendenan cu por tin un bon salario di por ehemplo 62.000 florin pa aña, e ta bay te 23% pa 40%, kiermen e ta bay 17% atras.

Si e punto ta cu gobierno ta bin cu e punto aki, nan pregunta ta: cuanto placa e ta genera cu e cambionan chikito unda cierto gruponan chikito ta wordo perhudica, e ta aden si of no?

Nan tin mas topico cu nan lo papia riba dje durante e Townhall Meeting pero un otro cu Kock a expresa ta e plan unda gobierno ta pensando di dicidi kico e salario ta si e persona ta director of doño di su mesun negoshi, e porcentahe mas grandi di compania cu KvK tin segun Kock a sigura ta e companianan chikito unda cu gobierno tin den su proposito determina cu ta 5.000 florin e salario cu nan mester haya, “pero si negoshi ta preta door di pandemia y cu awor nan a haya un chens, nan tin cu pone un salario asina separa di impuestonan cu tin cu paga”, Kock a bisa cu KvK no ta di acuerdo cu esey.

Nan ta espera e reaccion di tur hende den comercio na Aruba pa asina nan por reinventarisa y pone tur cos hunto den un carta pa mand’e pa Gobierno di Aruba.

Un ultimo punto cu e cual nan a keda sorpresa ta e invoerrechten na unda gobierno a papia di simplifica, Kock a destaca cu nan ta di acuerdo cu esey pero, den e simplificacion a bin cambionan tambe, den e proposicionnan tabata cu cierto invoerrechten lo subi cu 6% como por ehemplo, articulonan electronico.

“Nos tin cu proteha nos negoshinan, pasobra nan ta duna trabao na nos hendenan” y cu nan tin cu salvaguardia e trabaonan, nan ta di opinion cu pa awor no sigui mas cu e reforma fiscal aki y bay cobra e placa cu gobierno tin afo, el a finalisa.