KvK ta sostene iniciativa Comerciantenan Uni Aruba (CUA)

Camara di Comercio di Aruba (KvK) como gremio comercial ta sostene e iniciativa di un grupo di comerciante di diferente sector di nos economia bou e nomber di Comerciantenan Uni Aruba (CUA).

Presidente di Camara di Comercio di Aruba (KvK), Kawish Misier a declara cu nan ta aplaudi e iniciativa di e grupo aki. Te hasta nan a yega di reuni pa firma e carta cu nan a manda pa minister, ya cu nan ta di acuerdo cu e causa cu BBO tin cu keda riba recibo.

Misier a expresa den nomber di KvK cu nan ta contento cu comerciantenan a uni y cuminsa lanta nan preocupacion. E ta haya cu esaki ta un señal cu no solamente KvK a trece e echo cu ta prudente of consehabel pa kita e BBO for di recibo, sino cu otro mas gremio comercial y doñonan di trabou a uni pa e mesun meta aki.

Igualmente el a laga sa cu hopi biaha hendenan ta informa KvK tras di cortina, y asina e proceso a cuminsa. KvK a yega di ricibi diferente mensahe te hasta na luna di december ultimo, prome cu e ley di e reforma fiscal a wordo trata, y cu a bin ‘rumornan cu nos tin cu sconde BBO.’

E biaha ey, 6 gremio comercial a acerca KvK y hunto nan a yega di manda un carta pa gobierno y pa Parlamento. A base di esey nan a duna un extension di 6 luna y ultimo biaha pa 3 luna adicional te 1 di october awor. Segun Misier, KvK nunca a pidi un extension di 6 luna, sino cu nan a pidi pa BBO keda riba recibo.

El a agrega cu den e periodo aki KvK a pensa cu por trece nan mensahe dilanti cerca gobierno pa defende y argumenta nan posicion. Pero no tabatin niun reunion den e periodo ey, y tampoco KvK no a wordo invita como gremio comercial.

Solamente tabatin un reunion unda tur e shete gremionan comercial a wordo invita, pero solamente 3 di e 7 representantenan mag ta presente. Den e reunion aki nan a wordo informa cu niun decision a cay ainda y gobierno ta bezig evaluando nan decision.

Misier ta haya cu awor cu e grupo di Comerciantenan Uni Aruba a bay den media, e ta duna KvK mas credibilidad cu e posicion cu nan tin, e comunidad comercial ta para pe.

Comerciantenan Uni Aruba (CUA) a yega di cualifica nan mes como un grupo di comerciante sin color politico cu a uni pa vocifera nan preocupacion tocante e transparencia di e ley nobo cu ta regarda e maneho di BBO.