Camara di Comercio (KvK) a pidi pa gobierno reconsidera nan decision pa negoshinan of establecimento comercial elimina e impuestonan riba e recibo prome cu 1 di juli awor. E gremio comercial aki ta contra di e decision aki ya cu e negoshinan lo haya confronta cu molester administrativo y gastonan, sin mester.
Randall Croes di KvK a indica cu e cambio aki ta costa hopi ora di trabou, y no ta algo cu un negoshi tin inclui den su presupuesto, y e ta bira un gasto extra pa comercio. El a laga sa cu nan ta calcula un miyon di producto riba reki cu nan mester cambia prijs, contando tambe gasto extra di overtime pa cambia prijsnan despues di cera negoshi.
Nan ta haya cu hopi negoshi lo haya nan forsa na hisa nan prijsnan. Na final e cambio aki no ta brinda un solucion practico y tampoco transparente. Igualmente e miembro di e directiva di KvK a laga sa cu otro tabata e perspectiva economico ora a wordo anuncia e proyecto di rehabilita e refineria, pero aworaki e realidad ta otro, unda e refineria no a habri y trahadonan a perde nan trabou, y comercio ta cargando un carga pisa, ya cu no tin entrada pa compensa e gastonan. Mientras Aruba su costo di bida ta halto y gobierno ta sigui introduci mas belasting y aumento di salario minimo.
KvK su posicion ta cu no tabata e momento mas apropia pa gobierno introduci un aumento di salario minimo, ya cu sector priva no tin actualmente e capacidad economico pa ofrece y yuda cubri e gastonan cu esaki lo trece cune. Esaki mirando e serie di gastonan den operacion manera elimina e impuestonan (Bbo) riba e recibonan y medidanan den forma di belasting por ehempel Sin tax, Sugar tax, Tax ambiental y mas impuesto proponi.
KvK ta haya cu no por ta asina cu sector priva tin cu carga tur e gastonan y consecuencianan di e medidanan aki. Randall Croes a laga sa cu KvK por duna miho conseho, ya cu tin forma mas pragmatico, compara cu e medida di gobierno pa hisa salario minimo.
