Siman pasa, Camara di Comercio y Industria (KvK) tabatin un reunion informativo cu Minister di Finansas, Asuntonan Economico y Cultura, tocante cierto temanan, incluyendo algun punto cu ta figura den e “Landspakket” Aruba. KvK a expresa di ta aplaudi e firmamento di e acuerdo entre Aruba y Hulanda, teniendo na cuenta cu ta sumamente importante pa fortalece nos economia y pa por garantisa e stabilidad y siguridad economico y social di henter e comunidad di Aruba. E acuerdo ta fungi como un guia pa nos Pais pa cu e decisionnan cu wordo tuma den bienestar di nos comunidad y lo mester conduci na reformanan structural, economico, financiero, social y institucional cu e meta pa haci Aruba mas resistente y menos vulnerabel, sin pone nos autonomia den riesgo.

Ambos partido ta di acuerdo cu ta importante pa trece cambionan riba tereno economico. A wordo discuti cu ta necesario pa optimalisa e clima di inversion mas lihe posibel door di e.o. reduci e gastonan pa haci negoshi y minimalisa burocracia y e “red tape”pa asina por atrae inversionista, tanto local como internacional.

Actualisacion y flexibilisacion di e leynan laboral tambe tabata un di e temanan di e combersacion entre KvK y e mandatario. Flexibilisacion di e leynan di labor ta importante pa por garantisa oportunidad di sobrevivencia di un cantidad mas halto di negoshi y pa asina por tin un recuperacion rapido di nos economia. E leynan actual lo mira un cambio den corto tempo, pero alabes lo tuma den consideracion e personanan cu ta of lo bira desemplea pa por garantisa siguridad social door di sigui brinda cierto subsidio.

Pa logra rebiba nos economia mester trece fortificacion den digitalisacion y telecomunicacion, aplica “eGovernment” mas hopi posibel y ofrece e posibilidad pa empleadonan por “upgrade” nan mes, siña habilidadnan nobo y mehora e conocemento y experticio, por ehempel por medio di uzo di “e-learning” y cursonan online.

Camara di Comercio y Industria Aruba a ofrece di duna aporte y a comparti su pensamento riba e pasonan cu Aruba lo mester tuma pa comercio por sigui avansa, por ehempel introduciendo un team di 4 experto riba e area di impuesto, economia, finansas y “commerce and trade”. E meta ta pa guia e proceso di cambio cu conseho directo for di sector priva. Esaki lo pone e base principal y cuadra pa tuma decisionnan cu lo resulta den un ‘win-win’ situacion pa nos pueblo, comercio y Gobierno.

KvK ta spera cu Gobierno lo duna oido na su conseho y cu esaki lo resulta den rebiba nos economia cu ta sumamente necesario.