Te ainda Camara di Comercio (KvK) no ta mira niun medida pa stimula comercio, despues cu nan a participa hunto cu otro gremionan den consulta cu gobierno den cuadro di Master Plan gubernamental. “Tur cos ta den plan. Pero implementacion mester cuminsa bin,” segun presidente di KvK, Omar Tromp.
El a referi cu siman pasa gobierno a bin cu e agenda di ehecucion di e landspakket, caminda tin deadline den dje pa ehecuta e agenda aki. Mirando e situacion cu ainda nan no a mira niun medida pa stimula comercio, KvK hunto cu ATIA y AHATA a manda gobierno un carta siman pasa riba e asunto aki, ya cu ‘nos no ta tende nada’, el a declara. Nan kier haya un actualisacion di e situacion kico ta andando.
Como contesta di esey nan a yega di haya un reunion virtual cu Futura, cu ta manehando e MasterPlan di gobierno. Den e reunion aki e gremionan a haya un splicacion di e MasterPlan, pero mucho mas cu esey nan no a haya, segun presidente di KvK.
El a laga sa cu KvK ta wardando pa pasonan mas concreto di banda di gobierno, por ehempel riba cambio den nos ley laboral, cu nan ta haya cu mester bin lihe debi na e impacto di e pandemia riba entre otro actividad comercial.
KvK kier wak algo mas concreto den nos ley laboral, ya cu nan a yega di manda carta na luna di januari pa minister di Labor riba su posicion di no acepta peticion pa retiro den departamento di Labor (DPL). E gremionan aki a yega di manda carta, pero finalmente un compania local (Romar Trading), a bay corte y gana e caso, ya cu e decision di e mandatario tabata den pugna cu e ley mes.
“Bo tin cu tuma e peticion, y bo tin cu trat’e segun criteria estableci,” el a bisa. Te hasta DAO por nenga, pero alomenos e departamento aki mester acepta e peticion pa e retiro di un trahado. Presidente di KvK ta compronde cu DAO lo acepta e peticion di retiro pa trata nan. Pero nan ta e tipo di decision cu KvK ta lamenta cu gobierno no ta tene na cuenta cu ley laboral. Mescos el a referi na e decision di gobierno pa dialuna 15 di februari bira un dia liber, mientras cu no tin parada grandi di Carnaval. Locual KvK ta considera como un decision incorecto y contra ley.
Otro aspecto cu por alivia e peso riba e sector comercial ta e reforma fiscal. KvK ta mira cu e reforma fiscal ta bay tarda, y KvK ta premira -mirando cu e aña aki ta uno di eleccion- cu e reforma aki lo bini te otro aña. KvK ta di opinion cu ta prudente pa e reforma fiscal lo bay den direccion di impuesto indirecto pa medio di un sales tax of BTW cu lo reemplasa e otro formanan di impuesto.
Segun presidente di KvK e gastonan di AZV y SVb, e parti mas grandi ta cay pa e doño di trabao, y otro parti tambe pa e sector cu ta trahado, ta nan ta carga e fondonan aki. KvK ta kere cu tur hende na Aruba cu ta consumi algo tambe por ta parti di aporta den e fondo ey.
