Miembronan di directiva di Camara di Comercio y Industria Aruba (KvK) a organisa un sesion di brainstorming via Zoom hunto cu e ex-Presidentenan di Directiva di KvK pa haci uso di nan experticio y calidad di liderazgo pragmatico.

Humanidad tabata e punto di enfoke durante e reunion en cuanto economia di Aruba actual y e planificacion di un roadmap encuanto kic ohaci despues di COVID-19.

E crisis actual ta di un tal magnitud y asina unico cu e ta imposibel pa formula un plan concreto pa crea e pasonan pa recuperacion economico. Sin embargo e ta posibel pa inventarisa e condicionnan cu no ta optimalisa y limita e posibilidad pa sobrevivencia riba empleo y actividadnan economico.

Door di flexibilisa e leynan di labor mas lihe cu ta posibel,e ta importante pa por garantisa e chens di sobrevivencia di mas tanto negoshi posibel. Un recuperacion rapido di nos economia ta solamente posibel si nos por logra salba mas hopi negoshi cu ta posibel di bay bancarota. Si e ley actual no mira un cambio den corto tempo, un cantidad grandi di negoshi lo haya nan mes forsa pa bati bancarota. Gastonan fiho di negoshi cu ta inclui mas cu solamente paga salario di e empleadonan, lo sigui existi, mientras cu entradanan a wordo drasticamente reduci pa practicamente tur negoshi. E aplicacion di e norma nobo di 1,5 meter di distancia ta obliga cierto sectornan manera restaurant, pa reduci nan cantidad di ocupa bishitante, locual ta conduci na un perdida grandi di entrada. E dunado di trabou mester tin e posibilidad pa duna trabou den forma mas flexibel y wordo permiti pa duna un reduccion den e cantidad di oranan di trabou pa siman y cu un acuerdo di compensacion pa esaki. Banda di esaki e mester ta posibel pa por retira empleadonan bou cierto condicionnan.

E gastonan halto pa haci negoshi a wordo accentua cu e situacion financiero y crisis economico cu Aruba ta pasando aden como consecuencia di COVID-19. E echo aki ta uno hopi conoci durante e ultimo añanan y awo a surgi e urgencia pa tuma accion encuanto e problema aki. E situacion severo y e impacto di e virus y e Shelter in Place/Toque de Queda ta asina significante cu e ta rekeri solidaridad entre tur e residentenan di Aruba. Esaki ta solamente aplicable si e LMA wordo examina y adapta na e necesidadnan actual. E gastonan di gobierno por wordo reduci y tambe drecha practicanan cu no ta ful corecto. Den un accion uni caminda sector publico y sector priva ta tuma parti, pais Aruba mester urgi Hulanda pa brinda ayudo den forma gratuito y cu esaki realmente ta e unico opcion. Un prestamo significante pa por alivia e necesidadnan di e lunanan nos dilanti, hasta si ta bou condicionnan faborabel asocia cu e prestamo, lo ta un factor cu lo impedi un futuro desaroyo economico. Un consecuencia door di crea un debe adicional ta afecta e ratio di debe pa GDP significantemente y e lo surpasa 100%. Esaki ta crea un molester enorme pa generacionnan di futuro. Un alternativa na un donacion financiero por ta den forma di brinda paketenan di cuminda. Di e forma aki tambe e ta yuda preveni cu reservanan monetario ta wordo afecta door di haci compras den exterior ya cu awo no ta existi un ingreso for di turismo.

Optimalisa e clima di inversion mas lihe posibel, baha e gastonan pa haci negoshi, y berdaderamente reduci burocracia y e red tape pa inversionista local e internacional ta awo mas cu nunca un rekisito. E inversionista internacional no ta solamente duna forsa na nos economia local, pero tambe ta contribui na asegura un intercambio di divisas.

Tumando den consideracion nos ta urgi pa pagonan wordo haci na personanan den necesidad. Tanto FASE como e otro areglonan subsidiario ta hopi bon iniciativanan, pero ainda tin hopi incertidumbre den e comunidad (comercial). Empeoramento of disturbio den e seguridad actual mester wordo evita di tur forma posibel.

Finalmente, pa logra un rapido rebibamento di nos economia afecta den largo plaso, nos tin cu fortifica nos telecomunicacion, introduci eGovernment mas hopi posibel y ofrece e posibilidad pa empleadonan por siña abilidadnan nobo, drecha esnan existente y mehora e conocemento y experticio door di haya e-learning, cursonan online y otro formanan di ‘distance learning’.