Camara di Comercio y Industria (KvK) a tuma nota cu Banco Central (CBA) a anuncia cu desde 1 di juni 2021 lo suavisa gradualmente e restriccionnan di divisa cu CBA a implementa na maart 2020 debi na e pandemia di COVID 19.
KvK ta aplaudi e decision aki ya cu e restriccionnan a trece un peso adicional riba comercio, dificultando inversion y otro transaccionan financiero pa exterior tanto pa nos companianan local como tambe nos cuidadanonan.
Recientemente KvK a informa CBA por escrito di ta compronde cu tabata necesario pa tuma medida den e periodo concerni en bista cu e ingreso di divisa procedente di turismo, cu tabata aproximadamente 75% di e total, a disminui enormemente y e duracion y impacto di e pandemia no tabata conoci. Na e momento ey naturalmente proteccion di nos stabilidad monetario y financiero tabata na prome luga. Sinembargo, e intencion semper tabata pa e restriccionnan ta temporario. En bista cu e suma di e provision di divisa a aumenta durante e di 4 kwartaal di 2020 y a hasta surpasa esun na 2018 y 2019, KvK a expresa na CBA su opinion cu e restriccionnan lo por wordo suspendi.
CBA tambe a anuncia cu e suavisacion awo ta posibel basa riba e recuperacion continuo di nos economia, e perspectivanan positivo di turismo y cu e indicacion monetario y tecnico di cambio di divisa a aumenta na un nivel aceptabel.
KvK ta confia cu poco poco nos economia lo sigui recupera y cu introduccion di reformanan fiscal y laboral lo crea mas oportunidad pa por haci negoshi den e “normal nobo”.
