E tema di escasez di personal, sobretodo den e sector hotelero, ta uno cu pa hopi aña tin e atencion di e organisacionnan di e sector aki. Mediante un comunicado di prensa Camara di Comercio di Aruba (KvK) a informa cu esaki tabata un tema cu a bin dilanti durante nan reunion cu Minister Geoffrey Wever.
Algun dia atras Aruba Food & Beverage Association (AFBA) a tene un conferencia di prensa pa trece nan preocupacion pa dilanti tambe acerca e tema aki.
AFBA ta remarca cu e situacion ta yegando un nivel alarmante y cu nan ta trahando, hunto cu gobierno, pa yega na un soluciona mirando cu e situacion por empeora pa motibo di e hotelnan nobo cu ta den construccion y cu lo habri nan porta pronto.
Den nan comunicado KvK a expresa nan preocupacion riba e tema di escasez di empleado.
“Esaki ta un problema cu ya ta conoci pa hopi tempo, na unda KvK a expresa na varios ocasion su preocupacion riba e topico aki. Den proximo añanan lo bin mas o menos 2800 camber adicional, y no tin suficiente personal pa traha,” KvK a indica.
Nan ta remarca cu nan ta desea di haya informacion di Gobierno tocante e accionnan concreto cu lo tuma pa soluciona e problema aki, y alabes mitiga e consecuencianan si importa cantidad grandi di trahadonan for di exterior.
Un topico cu nan a trece la dilanti durante e reunion ta e proposicion di Gobierno pa cobra un tarifa di 35 dollar na cada turista na momento cu nan drenta Aruba.
Nan a enfatisa cu nan ta preocupa cu esaki lo por stroba grupo y/of famia grandi di bishita Aruba.
“KvK a trece dilanti cu lo tin fondonan disponibel di VNO (Vertegenwoordiging van Nederland) pa yuda soluciona e problema di RWZI. KvK ta di opinion cu si por haci uzo di e fondonan aki, no mester bolbe cobra un tarifa extra na e turistanan, y asina evita di pone un peso extra riba nos bishitantenan,” nan a subraya.
