Ayera mainta, Camara di Comercio (KvK) a tene un conferencia di prensa pa asina trece un aclaracion en cuanto cobransa pa consulta di registro comercial online, segun director ehecutivo di e organismo aki, Martijn Balkestein a sigura.

Na luna di maart di e aña aki, Camara di Comercio a bin cu un cambio unda nan a cuminsa cobra un fee pa consulta e datonan di registro comercial cu ta riba nan website, “nos a nota cu tin diferente relato riba media cu ta cuestiona esaki y mi kier bin pa clarifica kico KvK a haci, pakico nos ta haci esaki y kico ta e base legal pa haci esaki,” Balkestein a bisa.

El a sigura cu KvK ta obliga pa mantene un registro comercial pa publico henter pa tur hende por consulta na momento cu nan ta interesa pa solicita datonan di e sector comercial “nos ta haci esey caba desde momento cu KvK a ser lanta na aña 1930, nos tur sa cu e inflacion y digitalisacion ta hopi importante pa nos tur y pa e motibo ey ya caba nos a bin cu un sistema digital di 2006 y pa momento cu nos tabata na april 2019 nos a bin cu un upgrade significante, e ora ey nos a pone e registro comercial online riba nos website pa facilita y conecta comunidad cu tur hende.” Segun loke Balkestein a trece dilanti.

E registro comercial online aki ta un servicio adicional cu KvK ta duna y no ta un obligacion pa ley, nan a haciel’e pa comunidad por tin un servicio mas comodo pa haya datonan y nan ta considera esey hopi importante, ademas ta un sistema cu ta funciona banda di e registro di papel cu nan tin unda tur persona por solicita esey di manera gratis na KvK.

Pero nan a realisa cu e gastonan cu nan tin ta halto y esey ta nifica cu e cobransa aki ta bay pa mantencion di e sistema digital “aunke cu e gastonan cu nos tabatin ta halto pa motibo cu e sistema cu nos a bin ta costa un par di miyon florin, pa mantene esey ta costa nos 300.000 florin pa aña, pero aunke e gastonan ta halto KvK no a subi e tarifa di su productonan desde 2009 cu na e momento ey tabatin un inflacion di 21%.”

Balkestein a señala cu ta importante pa hende mester realisa cu KvK ta un compania Sui Generes, loke ta nifica cu nan mes mester genera nan entrada y nan no ta un departamento di gobierno, ni ta haya subsidio, e contribucion anual cu companianan ta paga mas e benta di uittreksels, ta e entrada principal di KvK.

Costonan di operacion di KvK a subi door di inflacion pero tambe door cu nan kier a brinda un servicio adicional pa tur hende y p’esey nan a cuminsa cobra un fee pa e registro online riba nan website, ademas a trece dilanti cu ta un paso necesario pa por proteha e datonan y mantene e sistema sostenibel y duradero manera Balkestein a enfatisa.

A pesar cu e no ta un obligacion legal di KvK ya ofrece traduccionnan di uittreksels, cu e fin pa facilita esey na comunidad. Sinembargo, esaki ta un servicio adicional cu tin costonan adicional, y pa es motibo, e traduccion di uittreksels ta costa mas cu 15 florin manera ta stipula den ley. E costo adicional ta pa cubri e gastonan di traduccion.

Segun e ‘Landsverordening op de Kamer van Koophandel en Nijverheid’ (AB 1990 no. GT29), KvK por cobra sumanan adicional pa e servicionan extra cu KvK ta brinda, e.o. por cobra un suma pa consulta e Registro Comercial online, y un suma adicional riba e tarifa di 15 florin stipula den ley pa e traduccion di e uittreksels.

Balkestein a señala cu tin diferente compania grandi cu a cumpra e abono sea pa aña of pa kwartaal pa motibo cu nan usa e datonan di KvK frecuentemente, tin otro cu ta bay na KvK pa cumpra esey, pa esaki nan a mira cu e benta di uittreksels a subi.

Riba e pregunta di redactor di Bon Dia Aruba pa loke ta trata dicon nan no a comunica comunidad cu nan ta bay cuminsa cobra pa registro online comercial? Balkestein a informa cu “nos a anticipa cu hendenan ta bay compronde cu na momento cu bo ta duna un service adicional cu ta costoso, mantene un registro asina ta hopi costoso. Loke nos ta cobra ta hopi mas abou cu loke por ehemplo Camara di Comercio na Boneiro of na Sint Maarten y Hulanda ta cobra, nan tambe ta practica e mesun cos y nos no a anticipa cu lo tin pregunta den comunidad tocante esaki.”

En cuanto e articulo cu a causa reaccion di KvK pa trece nan clarificacion dilanti, a sali publica den edicion di Bon Dia Aruba di dia 19 di juni ultimo cu e headline: Pagando e prijs? Cobranzanan di Camara di Comercio ta surpasa limite legal?

Den dje, ta cuestiona a introduccion di a cobransa di registro comercial online, “KvK por restringi acceso online pa publico na e registro online? Talvez esaki ta yama un siguiente pregunta: KvK tin e base legal pa impone un tarifa anual di Afl. 1.200,- pa aña o Afl. 300,- pa kwartaal? Si e contesta na e segundo pregunta ta no, anto e contesta na e promer pregunta ta bira irelevante, te ora crea un base legal. Te na e momento ey, KvK mester, segun mi opinion, habri e acceso online atrobe.” Ta un articulo resumen di un articulo mas extenso di mr. Delo Gomez, publica na Ingles riba LinkedIn.