Presidente di Camara di Comercio di Aruba (KvK), Kawish Misier y tambe Randall Croes kende ta miembro di e directiva di e gremio comercial aki, a cualifica como positivo e reunion cu nan a sostene cu Minister di Finansa, Xiomara Ruiz-Maduro tocante reforma fiscal.
Pero muy specificamente riba e discusion cu KvK ta bin hibando riba e cobransa di BBO, cu mester sigui aparece riba e recibo. Tambe e posicion di gobierno pa kita e BBO for di e recibo, y mas bien laga na discrecion di e comerciante mes, si ta inclui of no e BBO directamente riba e prijs di e productonan cu nan ta bende na e consumidornan, of si nan mes ta dicidi di carg’e.
Aunke te ainda no a cay un decision final riba ambos posicion di parti di gobierno, KvK ta masha agradecido pa e reunion cu nan a sostene cu e mandatario. Di banda di KvK nan ta convenci cu e biaha aki si nan a logra convence gobierno riba e beneficionan pa comercio, pero tambe pa gobierno mes, pa sigui mustra e suma di BBO riba e recibo di pago. Ya cu e forma cu gobierno kier bin cune den su reforma fiscal ta hisa gasto cerca e comerciantenan y e ta complica e manera pa nan haci negoshi.
Misier a bisa cu esaki ta e prome reunion cu KvK ta sostene cu e mandatario di finansa e aña aki, y cu nan a wordo invita pa nan por bay mas den detaye riba e pro y contra di e BBO riba recibo. E posicion di KvK ta uno conoci y nan ta na fabor di sigui mantene e BBO riba e recibo. Den e caso aki, Randall Croes a bin splica den forma masha ilustrativo y elemental nan punto di bista.
Sales tax estilo Mericano
Despues cu e economista aki a pasa brevemente riba e sales tax di diferente pais, el a indica e motibo pakico KvK ta na fabor di mantene e sistema di sales tax al estilo di Merca. Un sistema no acumulativo cu KvK ta haya faborabel y posibel pa implementa na Aruba.
El a splica cu ta un forma senciyo pa comercio por haci negoshi, pero tambe pa gobierno por genera entrada. Te hasta facilita gobierno pa cambia facilmente, ya sea e tarifa di belasting riba diferente tipo di producto/servicio cu gobierno kier penalisa, por ehempel tabaco. Of tambe riba e diferente tipo di negoshi.
Den e reunion –segun Croes– KvK a presenta e diferente bentaha y nan a wordo scucha. “Nos ta contento di e oportunidad eynan” el a bisa. Nan a probecha pa trece esaki dilanti durante un conferencia di prensa ayera tardi, e punto oficial di KvK. Pues den henter e discusion di reforma fiscal, KvK como gremio comercial, tin un preferencia pa un modelo BBO na estilo di sales tax di Merca.
Igualmente den nomber di directiva di KvK, Croes a bisa cu nan kier pone bon cla cu comercio ta compronde cu gobierno tabatin mester di mas placa pa atende cu su gastonan. Tampoco nan no tabata contra e medidanan ‘sumamente necesario’ riba e circunstancia real, entre nan cu e refineria no a habri, y di otro banda a wordo realisa compromiso financiero cu ta genera gastonan y pago di interes riba proyectonan realisa.
“Nos sa cu mester di placa, pero loke nos ta pidi ta, laga nos cobra pa gobierno di un forma barata y simpel”, el a bisa. Un forma cu –segun Croes– e cen por yega rapido den caha di gobierno, sin causa discusionnan legal, huridico, economico y financiero pa comercio.
Den conclusion, Croes a indica cu den e reunion ultimo cu nan tabatin cu minister di Finansa y Economia, tabatin bastante entendimento y el a mustra bon boluntad.
