Ta spera cu a largo plaso lo mester di 12mil trahador adicional
Mas o menos dos tercera parti di paisnan rond mundo ta luchando cu un scarsedad grandi di trahado. Por ehemplo, na Merca tin casi 5 miyon di cupo di trabao cu no por wordo yena, pasobra ta falta personal.
Na Aruba e situacion tambe ta severo. Hopi compania ta wordo confronta cu scarsedad di empleado, y tin hopi mas vacatura habri cu personanan disponibel cu por yena e cuponan di trabao. E escasez ta wordo causa door di diferente factor. Nos por menciona entre otro enbehecimento di nos poblacion, ampliacion di e cantidad di camber di hotel, regulacion di nos mercado laboral y un desconexion di habilidadnan (mismatch of skills).
Cu e meta di haya un miho bista riba e scarsedad di trahado, e tipo di trabao cu ta wordo ofreci y cual sectornan economico ta wordo afecta particularmente, Camara di Comercio (KvK) a tene un encuesta bao di nos sector comercial.
Tres-cuarta parti di e empresanan cu a participa den e encuesta a indica cu nan tabatin dificultad pa haya personal cualifica pa yena cupo di trabao. Mayoria di e companianan ta buscando entre 2 y 5 trahado y 20 porciento ta buscando hasta mas cu 10 empleado. Actualmente tin un escasez di empleado den tur sector economico. Dos-tercer parti di e empresanan ta cualifica e intensidad di e escasez como “intenso”, ademas 22.5% ta cualifica e escasez manera “modera”.
Mas cu mita di e empresanan ta kere cu e scarsedad di trahado lo empeora den e proximo 1 pa 2 aña, y solamente 8 porciento di nan ta pensa cu e situacion lo mehora. Companianan ta buscando un variacion grandi di trahado, manera pa haci limpiesa, room attendant, hende pa mantencion, hardinero coki, accountant, HR manager, ingeniero, arkitecto, operador di mashin, etc.
Cu e proyeccion di construccion di mas di 3000 camber di hotel y mas di 1000 condominio y apartamento den e proximo 4 aña, por spera cu e scarsedad di trahado lo crece significativo. Ta pone presion no solamente riba e sector hotelero, pero tambe riba sectornan manera e restaurantnan, companianan di deportenan na lama (watesportbedrijven), companianan di transportacion, mantencion y siguridad. Te cu aña 2025, ta spera cu lo mester tin mas di 4600 persona pa esaki. Pa largo plaso, ta spera cu lo tin mester di 12.000 trahado adicional.
E companianan a sugeri algun punto pa mitiga e problemanan, manera optimalisa e proceso di duna permiso, inverti den educacion y duna training, stop di traha mas hotel, cambia ley di labor, hisa salario minimo, stimula talentonan local, legalisa personanan indocumenta y implementa control fiscal.
KvK ta gradici tur persona cu a participa cu e encuesta, y lo uza e datonan colecta pa delibera cu gobierno riba e diferente maneranan pa mitiga e scarsedad di trahado.
