Un team di Camara di Comercio di Aruba (KvK) a probecha e oportunidad di e “Hackaton” cu a tuma luga recientemente den Caya Grandi pa traha un concepto pa maneha e area comercial y historico di centro di Oranjestad. Nan concepto ta cu e area aki mester wordo maneha pa un instancia priva den estilo ‘Sui generis’ den cual e comerciante(nan) mes di e area aki lo tin amplio representacion.
E concepto di KvK ta delinea pa un zona comercial di casi 200 mil meter cuadra cu ta bay entre Wilheminastraat te cu J.G. Emanstraat . E mester ta un area cu un diversidad grandi di diferente tipo di tiendanan y di actividadnan pa e bishitantenan local como turista di tur edad; principalmente e nucleo di famia.
Entidad pa maneha caya grandi
E iniciativa di crea un entidad nobo a bin despues cu KvK a scucha tur e kehonan di e comerciantenan cu a bin pa dilanti individualmente. Nan ta mira cu e comerciantenan tin hopi problema comun; pero tambe tin solucionnan cu a wordo implementa den pasado pa resolve un problema.
Aunke KvK a bin cu e iniciativa aki pa maneha e area comercial di centro di ciudad, ya caba desde cu MAMBO a stop di existi, gobierno a bin cu un instancia, esta OBID cu mester percura pa e maneho di caya grandi y bisindario. De Mey a splica bon cla cu KvK a para banda di e comerciantenan di e area aki pa casi tres aña caba. E tabata masha prudente pa duna un opinion ariba e trabou cu OBID ta bin realisando of su rol pa promove y stimula e benta nan den area comercial aki. KvK ta notando for di e comerciantenan cu tin un necesidad grandi pa nan tin mas participacion activo den e maneho di e caya Betico Croes mes. De Mey a bisa cu apesar di tur iniciativa y sugerencia pa stimula e area comercial aki, si e concepto di e zona comercial no ta optimal, nan no lo “tin e efecto maximo”.
Den nan concepto, KvK no ta papia specificamente di OBID, pero mas bien di bin cu un entidad nobo den forma ‘Suis Generis’ cu ta wordo maneha pa e comerciantenan mes. E ta kere personalmente cu esaki ta e unico manera pa maneha zona aki, pasobra e comerciantenan lo tin un miho envolvimento den e maneho di e area comercial y historico aki. Tambe nan mester tin siguridad cu e diversidad di actividad y di tipo di negoshi mester ta un realidad. Na aña 2024 fundacion oficial di Oranjestad ta bay cumpli 200 aña.
Ainda KvK ta trahando riba e concepto aki pa pone den otro. Nan ta preparando un presentacion pa e ministernan concerni. Unabes cu e ta cla, KvK lo presenta e plan no solamente na gobierno, sino na sector priva y comerciantenan di Playa pa sostene esaki.
Dialogo Nacional
Sr. Randall Croes kende ta miembro di e board di e hunta directiva di KvK a splica cu unabes legalmente e instancia aki ta keda funda, e comerciantenan lo nombra su directiva al estilo ATA, integra pa representantenan di e comerciantenan, gobierno y e habitantenan cu ta biba den e zona aki. Te hasta e ta kere cu e instancia aki por traha hunto cu OBID, ya cu e instancia Suis Generis cu nan ta propone, lo ta uno di e sector priva trahando hunto cu gobierno.
Actualmente nan a traha un presupuesto pa haya un bista di cuanto e ta bay costa; y di otro banda con nan por genera fondo pa e por bira un realidad. “Na Aruba ora cu nos ta pone cabes hunto, nos tur sa cuanto nos a logra”, el a declara. E ta kere cu e situacion di caya grandi y Oranjestad ta merece un Dialogo Nacional cu envolvimento di diferente socionan pa asina aproba un proyecto cu tur hende ta para su tras.
E ta haya cu unabes cu e comerciantenan por wak cu un institucion ta traha exclusivamente pa promove mas negoshi pa nan, protege nan contra vandalismo y genera mas trafico den nan negoshi y nan potencial di benta lo crece, nan lo ta mas dispuesto pa sostene un tipo di institucion asina.
Un punto cu hala atencion for di splicacion duna pa Croes ta cu e entidad lo haya e tereno di gobierno aki den su maneho, ya cu e ta bira un tereno priva, manera aeropuerto cu tin tur autoridad riba su tereno. “Unabes cu e ta bira un tereno priva, e parti di siguridad ta bira un responsabilidad di e instancia aki tambe. Tur tienda y tur habitante tin acceso liber pa drenta of sali, locual ta para den nos ley como un “erfdienstbaarheid”, el a bisa.
E instancia aki lo tin flexibilidad di actua mas rapido pa organisa actividadnan, permiti ponemento di wi-fi y yuda pa tur iniciativa y proyecto cu ainda no a wordo ehecuta lo por bira realidad den e area aki.
